యాదాద్రి భువనగిరి జిల్లా ఆత్మకూరు మండలంలోని కరోనా పాజిటివ్ కేసులు నమోదైన గ్రామంలో ఎమ్మెల్యే గొంగిడి సునీతా మహేందర్ రెడ్డి దాదాపు 550 కుటుంబాలకు కూరగాయలను పంపిణీ చేశారు.అనంతరం కొవిడ్-19 పట్ల ప్రజలకు అవగాహన కల్పించారు.
కరోనా మహమ్మారి కట్టడి కోసం ప్రతి ఒక్కరూ స్వీయ నియంత్రణ చర్యలు తీసుకోవాలని సూచించారు. కొవిడ్-19 కట్టడికి అనునిత్యం కష్టపడుతన్న పోలీస్, వైద్య, గ్రామ పంచాయతీ సిబ్బందిని సన్మానించారు.
ధాన్యం కొనుగోలు కేంద్రం సందర్శన...
ఆత్మకూరు మండలం పల్లెర్ల గ్రామంలో ధాన్యం కొనుగోలు కేంద్రాన్ని ఎమ్మెల్యే సునీతా మహేందర్ రెడ్డి సందర్శించారు. ధాన్యం కొనుగోలు గురించి అన్నదాతలను అడిగి తెలుసుకున్నారు. రవాణా సదుపాయం సరిగా లేకపోవడం వల్ల ఇబ్బందులు పడుతున్నట్లు రైతులు శాసన సభ్యురాలు దృష్టికి తీసుకెళ్లారు. వెంటనే ఎమ్మెల్యే జిల్లా జాయింట్ కలెక్టర్ రమేశ్తో మాట్లాడి లారీలను ఏర్పాటు చేసి రైతులకు సహకరించాలని సూచించారు.
ముస్లింలకు కానుకల పంపిణీ...
ఆత్మకూరు మండల కేంద్రంలో రంజాన్ పండుగ సందర్భంగా హీల్ స్వచ్ఛంద సంస్థ ఆధ్వర్యంలో తోఫా కార్యక్రమాన్ని ఏర్పాటు చేశారు. ముఖ్య అతిథిగా హాజరైన ఎమ్మెల్యే సునీతా మహేందర్ రెడ్డి... ముస్లింలకు రంజాన్ తోఫా(కానుక) అందించారు. కరోనా వ్యాప్తి నేపథ్యంలో హీల్ సంస్థ ముందుకొచ్చి ముస్లింలను ఆదుకోవడం అభినందనీయం అన్నారు.
