Etela Comments on KCR: రాష్ట్రమొస్తే నీళ్లు, నిధులు, నియామకాలు వస్తాయని ప్రజలు ఆశించారని భాజపా ఎమ్మెల్యే ఈటల రాజేందర్ అన్నారు. కానీ తెలంగాణ వచ్చాక ప్రజల ఆశలు అడియాశలయ్యాయని ఆవేదన వ్యక్తం చేశారు. యాదాద్రి జిల్లా తుర్కపల్లిలో ఏర్పాటు చేసిన పలు పార్టీల నేతలు భాజపాలో చేరిక కార్యక్రమంలో ఆయన ఈ వ్యాఖ్యలు చేశారు.
రాష్ట్రంలో కల్వకుంట్ల కుటుంబం తప్ప.. ప్రజలు బాగుపడలేదని ఈటల రాజేందర్ విమర్శించారు. అభివృద్ధి జరగలేదని చెప్పేందుకు తుర్కపల్లి మండలమే నిదర్శనమన్నారు. వరి పంట వేయొద్దని హుకుం జారీ చేసిన ఏకైక సీఎం కేసీఆర్ అని ఆరోపించారు. తరుగు పేరుతో రైతులను ఆగం చేస్తున్నారని ఆక్షేపించారు. దేశంలో ఎక్కువ మద్యం అమ్మకాలు జరిగేది తెలంగాణలోనేనని వ్యాఖ్యానించారు. స్వరాష్ట్రంలోని రైతులను గాలికి వదిలేసి పంజాబ్‌ రైతులకు సాయం చేయడమేంటని ప్రశ్నించారు. రాష్ట్రంలో రైతుల చావులు సీఎం కేసీఆర్‌కు పట్టవా?అని ప్రశ్నించారు. తెలంగాణలో రానున్న రోజుల్లో కాషాయ జెండా ఎగరడం ఖాయమని ఈటల రాజేందర్ ధీమా వ్యక్తం చేశారు.