indrakaran review on yadadri: రాజకీయ లబ్ధి కోసం ప్రసిద్ధ పుణ్యక్షేత్రం యాదాద్రిపై విమ‌ర్శలు చేయ‌డం స‌రికాదని దేవాదాయశాఖ మంత్రి అల్లోల ఇంద్రకరణ్ రెడ్డి అన్నారు. చిన్న చిన్న సమస్యలను కూడా భూతద్దంలో చూపెట్టే ప్రయత్నాలు చేస్తున్నారని మంత్రి ఆక్షేపించారు. యాదాద్రిలో భక్తుల సౌకర్యాలపై మంత్రి ఇంద్రకరణ్ రెడ్డి... దేవాదాయ, ఆర్‌ అండ్‌ బీ శాఖల అధికారులతో సమీక్షా సమావేశం నిర్వహించారు.
క్యూ కాంప్లెక్స్లో తాగునీటి ఇబ్బందులు లేకుండా చూడ‌టం, వాష్ రూమ్స్లో ప‌రిశుభ్రత, కొండపై చ‌లువ పందిళ్లు ఏర్పాటు, మురుగునీటి కాల్వల నిర్వహ‌ణ, క్యూ కాంప్లెక్స్లో ఫ్యాన్‌ల నిర్వహ‌ణ, వృద్ధులు, విక‌లాంగుల‌కు వీల్ఛైర్లు, కొండ కింద మొబైల్ టాయిలెట్ల ఏర్పాటు, ఇత‌ర వ‌స‌తుల ఏర్పాటుపై మంత్రి చర్చించారు. ఈ సందర్భంగా అకాల వ‌ర్షం వ‌ల్ల ఉత్పన్నమైన సమస్యలు, పునరుద్ధరణ చర్యలను అధికారులను అడిగి తెలుసుకున్నారు. సమస్యలు భవిష్యత్‌లో పునరావృతం కాకుండా వర్షాకాలంలోగా అధిగమించేలా చర్యలు తీసుకోవాలని సూచించారు. మౌలిక వసతులపై ప్రధానంగా దృష్టిసారించాలన్నారు.