Yadadri Shivalayam Maha Kumbhabhishekam: యాదగిరిగుట్ట శ్రీలక్ష్మీ నరసింహ స్వామి అనుబంధ ఆలయం పర్వతవర్ధిని రామలింగేశ్వర స్వామి ఆలయ ఉద్ఘాటన మహోత్సవం కొనసాగుతోంది. శివాలయ పునఃప్రారంభం సందర్భంగా రెండో రోజు మహాకుంభాభిషేక మహోత్సవ పూజలు కొనసాగుతున్నాయి. యాగశాల ప్రవేశం, మండపం, స్తంభ ద్వారాతోరణ పూజ, చతుస్థానార్చనలు, హోమకుండ సంస్కారం, అగ్ని ప్రతిష్ఠ, మహారుద్ర పురశ్చరణ, మూల మంత్రానుష్టాన హవనములతో రెండో రోజు పూజలు నిర్వహించారు. సాయంత్రం శాంతి, దీక్షాహోమము, ఆగ్న్యత్తారణము, కౌతుక బంధనము, జలాధివాసము జరపనున్నారు.
ఆలయ మహాకుంభాభిషేకాన్ని ఈ నెల 25న నిర్వహించనున్నారు. నిన్న, నేడు ఆలయ అంకురార్పణ, యాగశాల ప్రవేశం జరగ్గా.. 23న మహాలింగార్చనం, ధాన్యాధివాసం, 24న శతరుద్రాభిషేకం, పుష్పాధివాసం నిర్వహిస్తున్నారు. 25న (సోమవారం) ఉదయం 10.25 గంటలకు ధనిష్ఠా నక్షత్ర యుక్త మిధున లగ్న పుష్కరాంశ సముహూర్తమున మహాకుంభాభిషేక మహోత్సవం ఉంటుంది. స్మార్త ఆగమ సంప్రదాయంలో ఉత్సవాలు నిర్వహిస్తున్నారు. అదే రోజు సాయంత్రం నుంచి దైవదర్శనాలు మొదలవుతాయి.