భువనగిరి ఖిల్లా సాక్షిగా... ప్రేమజంట ఆత్మహత్యాయత్నం

తమ ప్రేమను తల్లిదండ్రులు అంగీకరిస్తారో లేదో అన్న భయంతో ఆత్మహత్యకు యత్నించింది ఓ ప్రేమ జంట. స్నేహితులకు చివరిసారి ఫోన్​ చేసి భువనగిరి ఖిల్లా సాక్షిగా తాము తనువు చాలిస్తున్నట్లు తెలిపారు. పోలీసులు హుటాహుటిన ఘటనాస్థలికి చేరుకుని ఆస్పత్రికి తరలించారు.

భువనగిరి ఖిల్లాపై ఓ ప్రేమ జంట ఆత్మహత్యకు యత్నించింది. సిద్దిపేట జిల్లా చేర్యాల మండలం కడవేరుకు చెందిన కోడూరి నవీన్ బైక్​ మెకానిక్​గా పనిచేస్తున్నాడు. కొమురవెల్లి మండలం వేచరేనికి చెందిన యువతి ఇంటర్​ చదువుతోంది. వీరిద్దరూ చాలా కాలంగా ప్రేమించుకోగా.. తమ తల్లిదండ్రులు ఒప్పుకోరనే భయంతో శనివారం ఉదయం ఇంటి నుంచి పారిపోయారు.

భువనగిరికి వచ్చిన ప్రేమికుల జంట... ఈరోజు ఉదయం ఖిల్లాపై విషం తాగారు. పట్టణంలో ఉంటున్న స్నేహితులకు ఫోన్​ చేసి విషయం తెలిపాడు నవీన్​. ఆందోళన చెందిన స్నేహితులు వెంటనే డయల్​ 100కు సమాచారం ఇచ్చారు. ఘటనా స్థలికి చేరుకున్న పోలీసులు.... బాధితులను ఆస్పత్రికి తీసుకొచ్చారు. ఇద్దరి పరిస్థితి విషమంగా ఉండటం వల్ల... హైదరాబాద్ గాంధీ ఆస్పత్రికి తరలించారు. పోలీసులు కేసు నమోదు చేసి దర్యాప్తు జరుపుతున్నారు.

ఇదీ చూడండి:'రష్మికకు ట్వీట్‌ చేసింది కలెక్టర్​ కాదు.. పరిశ్రమలశాఖ ఉద్యోగి'