నేటి నుంచి మాజీ ఎంపీ సర్వోదయ పాదయాత్ర.. పాల్గొననున్న రాహుల్​ గాంధీ

Congress Sarvodaya Padayatra: మాజీ ఎంపీ మీనాక్షి నటరాజన్​ సర్వోదయ పాదయాత్ర నేటి నుంచి ప్రారంభం కానుంది. యాదాద్రి జిల్లా భూదాన్ పోచంపల్లి నుంచి.. మహారాష్ట్రలోని వార్ధా వరకు యాత్ర కొనసాగనుంది. భూదాన్​ కార్యక్రమానికి 75 ఏళ్లు పూర్తయిన సందర్భంగా యాత్ర చేపడుతున్నట్లు కాంగ్రెస్​ నేతలు మీడియాకు తెలిపారు.

Congress Sarvodaya Padayatra: మార్చి 14 సోమవారం నుంచి మాజీ ఎంపీ, రాజీవ్‌ గాంధీ పంచాయతీ రాజ్‌ సంఘటన్ ఛైర్మన్‌ మీనాక్షి నటరాజన్‌ సర్వోదయ పాదయాత్రను ప్రారంభిస్తున్నారని తెలంగాణ కాంగ్రెస్ వర్కింగ్ ప్రెసిడెంట్‌ మహేశ్​ కుమార్ గౌడ్‌ వెల్లడించారు. యాదాద్రి భువనగిరి జిల్లా భూదాన్​ పోచంపల్లి నుంచి యాత్ర ప్రారంభం కానుందన్నారు. పేదల భూ సమస్యల పరిష్కారం కోసం సర్వోదయ యాత్ర చేపడుతున్నట్లు తెలిపారు. నేటి నుంచి ప్రారంభమయ్యే సర్వోదయ పాదయాత్ర 26 రోజులపాటు తెలంగాణలో ఉంటుందని... అనంతరం వార్ధా వరకు కొనసాగుతుందని మహేశ్​ కుమార్ గౌడ్‌ ఆదివారం వివరించారు.

సర్వోదయ పాదయాత్ర వివరాలను గాంధీభవన్​లో మహేశ్​ కుమార్ గౌడ్‌, పటేల్ రమేశ్​ రెడ్డి, పెద్దపల్లి డీసీసీ అధ్యక్షులు రవితోపాటు ఇతర కాంగ్రెస్‌ నేతలు వెల్లడించారు. భూదాన్ కార్యక్రమం ప్రారంభించి 75ఏళ్లు పూర్తయిన సందర్భంగా ఈ యాత్రను ప్రారంభిస్తున్నామని అన్నారు. ఈ యాత్రలో ఒక రోజు ఏఐసీసీ అగ్రనేత రాహుల్ గాంధీ పాల్గొంటారని తెలిపారు. సోమవారం ఉదయం సీఎల్పీ నేత భట్టి విక్రమార్క, శనివారం టీపీసీసీ అధ్యక్షుడు రేవంత్ రెడ్డి, ఆదివారం ఉత్తమ్‌కుమార్‌ రెడ్డి పాల్గొంటారని మహేశ్​ కుమార్ గౌడ్‌ వివరించారు.

ఇదీ చదవండి:ఉత్తరాఖండ్‌ ఎన్నికల్లో భాజపా గెలవడానికి కేసీఆరే కారణం: మధుయాష్కీ