కాలేజీ విద్యార్థులకు గంజాయి విక్రయిస్తున్న ముఠా అరెస్టు

కళాశాల విద్యార్థులకు గంజాయి సరఫరా చేస్తున్న ఓ మహిళతో పాటు ఐదుగురు నిందితులను వరంగల్​ టాస్క్​ఫోర్స్​ పోలీసులు పట్టుకున్నారు. వారి నుంచి పది లక్షల విలువైన 10 కిలోల గంజాయి స్వాధీనం చేసుకున్నట్లు పోలీసులు తెలిపారు.

వరంగల్‌ పోలీస్‌ కమిషనరేట్‌ పరిధిలో యువతతో పాటు విద్యార్థులకు గంజాయి విక్రయిస్తున్న ఓ ముఠా టాస్క్​ఫోర్స్​ పోలీసులకు చిక్కారు. ఓ మహిళతో పాటు ఐదుగురిని అరెస్టు చేసి... పది లక్షల విలువైన గంజాయి స్వాధీనం చేసకున్నట్లు నగర సీపీ రవిచందర్​ తెలిపారు.

మహబూబాబాద్‌ జిల్లాకు చెందిన మహిళా నిందితురాలు తక్కువ మొత్తానికి గంజాయి కొని వరంగల్​లో ఉన్న నలుగురికి అందజేసేది. గంజాయిని చిన్న చిన్న పొట్లాలుగా తయారు చేసి కళాశాల విద్యార్థులకు, యువతకు అమ్మే వారని సీపీ తెలిపారు. విశ్వసనీయ సమాచారంతో కాపుకాసి నిందితులను పట్టుకున్నట్లు పోలీసుల వెల్లడించారు.

చైన్​స్నాచింగ్​ దొంగ అరెస్ట్​

గంజాయి ముఠాతో పాటు నగరంలో చైన్​ స్నాచింగ్​కు పాల్పడిన నిందితుడిని హన్మకొండ పోలీసులు పట్టుకున్నట్లు సీపీ వెల్లడించారు. నిందితుడి నుంచి రెండు లక్షల 60 వేల విలువైన బంగారం స్వాధీనం చేసుకున్నామన్నారు. నిందితుడు మధ్యప్రదేశ్​కు చెందిన ప్యారేలాల్​గా గుర్తించారు.

ఇదీ చూడండి: భారీగా డ్రగ్స్​ స్వాధీనం.. నిందితులకు పాక్​తో సంబంధాలు!