ఓరుగల్లులో రహదారి ప్రయాణం... నిత్యం నరక ప్రాయం

వరంగల్​... ఈ పేరు వింటే మనకు గుర్తొచ్చేది ప్రసిద్ధ ఓరుగల్లు కోట, వేయి స్తంభాల గుడి వంటి పర్యాటక ప్రదేశాలు. అలాంటి మహానగరంలో రహదారులు చూస్తే నరకప్రాయంగా మారాయి. అభివృద్ధి పేరిట గుంతలు తవ్వి, కంకర పోసి వదిలేశారు అధికారులు. అలాంటి రోడ్లపై ప్రయాణం చేయలేక... ఎప్పుడు ఏ ప్రమాదం జరుగుతుందోనని నగరవాసులు ఆందోళనకు గురవుతున్నారు.

గుంతలు పడిన రహదారులు, కంకర తేలిన రోడ్లు... ప్రయాణం చేయలేక ప్రజలకు ఇబ్బందులు. ఎక్కడో అనుకుంటున్నారా...? కాకతీయుల రాజధాని ఓరుగల్లు మహా నగరంలో. ఇక్కడ ప్రధాన రహదారులన్నీ నరక ప్రాయంగా మారాయి. పలు చోట్ల అధ్వాన్నంగా తయారైన రోడ్లపై ప్రయాణం చేయాలంటేనే వాహనదారులు బెంబేలెత్తుతున్నారు.

అభివృద్ధి పేరిట అధ్వాన్నం

జిల్లాలో అంతంత మాత్రంగా ఉన్న రహదారులను మరమ్మతుల పేరిట అధికారులు తవ్వించి వదిలేశారు. నామమాత్రంగా కంకర పోసి చేతులు దులుపుకున్నారు. ఆరెపల్లి, పైడిపల్లి గ్రామాలను కలిపే దేశాయిపేట రహదారిపై ప్రయాణం చేయాలంటేనే నగర వాసులు జంకుతున్నారు. అంతర్గత రహదారి అయినప్పటికీ భారీ వాహనాల రాకతో పూర్తిగా దెబ్బతిందని వాహనదారులు ఆగ్రహం వ్యక్తం చేస్తున్నారు. గత కమిషనర్​ శృతి ఓఝా చొరవతో వీటిని నిలిపివేసినప్పటికీ... కమిషనర్​ బదిలీతో పెద్ద వాహనాల రాకపోకలు యథావిథిగా మొదలయ్యాయి. ప్రాణాలు అరచేతిలో పెట్టుకుని రహదారులపై ప్రయాణం చేయాల్సి వస్తుందని వాహన దారులు ఆవేదన వ్యక్తం చేస్తున్నారు.

వివాదం తెచ్చిన తంటా...

దేశాయిపేట రహదారిని అభివృద్ధి చేసేందుకు కొత్త మున్సిపల్​ కమిషనర్​ గౌతమ్​ ఇంజినీర్లతో ప్రణాళికలు రచించారు. అయితే అప్పటి మేయర్​, మాజీ ఎమ్మెల్యే కొండా దంపతుల మధ్య చెలరేగిన వివాదాలతో పనులకు అడ్డుకట్ట పడింది. అయినప్పటికీ కమిషనర్​ ఆదేశాలతో కిలోమీటరు మేర యుద్ధప్రాతిపదికన పనులు పూర్తి చేశారు. శాసన సభ ఎన్నికల అనంతరం గౌతమ్​ బదిలీ కావడం వల్ల కథ మళ్లీ మొదటికొచ్చింది. కంకర తేలిన రోడ్లపై ప్రయాణం వల్ల చెలరేగిన దుమ్ము కారణంగా అనారోగ్యం బారిన పడుతున్నామని వాహనదారులు వాపోతున్నారు. ఇప్పటికైనా అధికారులు స్పందించి అర్ధంతరంగా వదిలేసిన రోడ్డు నిర్మాణ పనులను పూర్తి చేయాలని నగర వాసులు కోరుతున్నారు.

ఇదీ చూడండి : అక్రమంగా కట్టారు.. అధికారులు కూల్చేశారు..