Parakala Amaradhamam : నాటి అమరవీరుల త్యాగాలకు గుర్తుగా పరకాల అమరదామం.. ఈ విశేషాలు తెలుసా..?

Parakala Amaradhamam : నిజాం పాలనకు వ్యతిరేకంగా పోరాడిన గడ్డ అది. తమనూ భారతదేశంలో కలపాలని కోరుతూ.. సమరం పూరించిన వారిపై ఫిరంగీలు ఎక్కుపెట్టారు. ఏకంగా 13 మంది అమరవీరులు అమరులు అయ్యారు. వారి జ్ఞాపకాలను నేటి తరాలకు చూపించాలనే ధ్యేయంతో పరకాల పట్టణంలో అమరదామం నిర్మించారు. ఈ అమరదామం విశేషాలను ఒకసారి తెలుసుకుందాం.

Parakala Amaradhamam : నిజాం నిరంకుశ పాలనకు ఎదురెళ్లి ప్రాణాలను లెక్క చేయకుండా.. నిజాం తూటాలకు బలైన ఎంతోమంది అమరవీరుల త్యాగాలకు గుర్తుగా హనుమకొండ జిల్లా పరకాల పట్టణంలోని అమరదామం(Amaradhamam) కళ్లకు కట్టినట్లుగా నిర్మించారు. ప్రతి ఏటా అమరవీరులను(Martyrs) స్మరిస్తూ సెప్టెంబర్ 2న ఘనంగా నివాళులు అర్పిస్తారు.

దేశానికి 1947 ఆగస్టు 15న స్వాతంత్య్రం వచ్చినా.. నిజాం రాజ్య పరిధిలోని నేటి తెలంగాణ, కొంత మహారాష్ట్ర, కర్ణాటక రాష్ట్రాల్లోని జిల్లాల్లోని ప్రజలకు నిరంకుశ పాలన కింద కొనసాగుతూనే ఉంది. ఈ నేపథ్యంలోనే హైదరాబాద్‌ సంస్థానాన్ని భారత యూనియన్‌లో కలపాలని పెద్ద ఎత్తున స్వాతంత్య్ర పోరాటం సాగింది. దీనిలో భాగంగా పరకాల ప్రాంతంలో 1947 సెప్టెంబరు 2న పరకాలలోని విశాల మైదానం(ఇప్పటి అమరవీర స్వాతంత్య్ర సమరవీర మనోహర స్మారక భవనం)లో త్రివర్ణ పతాకాన్ని ఎగురవేయడానికి వేలాదిగా వివిధ గ్రామాల ప్రజలు చేరుకున్నారు. వీరందరూ ఖజానా కొల్లగొట్టడానికి వస్తున్నారని నిజాం సిపాయిలకు స్థానిక తహసీల్దార్‌ తప్పుడు సమాచారం అందించారు.

Parakala Martyrs Memorial Stupa : ఆ సమాచారంతో అప్పటి సర్కిల్‌ ఇన్‌స్పెక్టర్‌ జియా ఉల్లా నేతృత్వంలోని రజాకార్లు విచక్షణారహితంగా కాల్పులు జరపడం, లాఠీఛార్జీ చేయటంతో క్షణాల్లో ఆ ప్రాంతం మరుభూమిగా మారింది. పరకాల మైదానంలో అమరవీరుల రక్తపుటేరులు పారాయి. ఈ ఘటనలో 13 మంది పోరాట యోధులు అక్కడికక్కడే అమరవీరులు అవ్వగా.. వందలాది మంది క్షతగాత్రులయ్యారు.

రేగొండ మండలం దమ్మన్నపేట, కనపర్తి, నాగుర్లపల్లె, రేగొండ, చిట్యాల మండలం చల్లగరిగె, గోవిందాపురం గ్రామానికి చెందిన పలువురు ప్రాణాలు కోల్పోయారు. ఇదే సమయంలో మొగుళ్లపల్లి మండలం రంగాపురం గ్రామానికి చెందిన ఆకుతోట మల్లయ్య, వర్దెల్లి వీరయ్య, ఎండీ రాజ్‌మహ్మద్‌లను ఒకే చెట్టుకు కట్టేసి రజాకారులు దారుణంగా కాల్చి చంపారు. తర్వాత 1948 సెప్టెంబరు 17న తెలంగాణ ప్రాంతానికి విముక్తి లభించింది.

Parakala Amaraverula Amaradhamam : సమరయోధులను గుర్తుకు తెచ్చేలా.. ఉద్యమకారుల పోరాట చరిత్రను భావితరాలు గుర్తుంచుకునేలా కరీంనగర్‌ జిల్లాకు చెందిన చెన్నమనేని చంద్రమ్మ ట్రస్ట్‌ ఆధ్వర్యంలో సెప్టెంబరు 17, 2003న అప్పటి కేంద్రమంత్రి, మాజీ మహారాష్ట్ర గవర్నర్‌ విద్యాసాగర్‌రావు పురపాలక సంఘం కార్యాలయ భవనం వెనకాల అమరదామాన్ని నిర్మించారు. నిజాం మూకల దౌర్జన్య కాండను ఇక్కడి శిల్పాలు కళ్ల ముందు కనిపించే విధంగా ఉంటాయి. ఆ అమరదామాన్ని చూసేందుకు పొరుగు జిల్లాల నుంచి వందలాదిగా వస్తుంటారు.

Amaradhaam Built by BJP Leader Vidyasagar Rao : ఈ అమరదామంలో పలు ఆల్బమ్‌ పాటలను చిత్రీకరించారు. పక్కనే పిల్లల పార్కు కూడా ఉండటంతో పర్యాటక ప్రదేశంగా మారుతోంది. త్యాగధనులను గుర్తు చేసుకుంటూ ఏటా సెప్టెంబరు 2న అమరవీరుల మైదానానికి పరకాల పాత తాలుకా పరిధిలోని మండలాలకు చెందిన స్వాతంత్య్ర సమరయోధుల వారసులు చేరుకుని అమరుల త్యాగాలను స్మరించుకొంటూ సమావేశాలు నిర్వహిస్తుంటారు. ఆనాటి పోరాటంలో అసువులు బాసిన యోధుల శిలాఫలకానికి పూలమాలలు వేసి నివాళులు అర్పిస్తారు.