ఆగస్టు నెల వచ్చేసింది.. అయినా కరోనా కలవర పాటు తగ్గలేదు సరికదా మరింత పెరిగింది. రోజు రోజుకీ పెరుగుతున్న కేసులు చూస్తుంటే కంటిమీద కునుకే రావట్లేదు. మార్కెట్కు వెళ్లి కూరగాయలు, పళ్లు తేవాలన్నా, దుకాణాలకు వెళ్లి సరుకులు తేవాలన్నా.. ఎక్కడ వాటి మీద వైరస్ ఉందో?.. అది ఎక్కడ మనకు అంటుకుంటుందోనన్న భయం వెంటాడుతోంది. దీంతో తీసుకొచ్చిన కూరగాయలు, ఇతరత్రా వస్తువులను శుభ్రం చేయడానికి అధిక సమయం వెచ్చించాల్సి వస్తోంది. ఇంత చేసినా కూడా ఇంకా ఏ మూలో తెలియని భయం. ఇక ఆభరణాలు, సెల్ ఫోను, బట్టలు ఇలా మనం ధరించిన వాటిపైనా... మన చేతుల్లో ఉన్నవాటిపైనా వైరస్ ఉండవచ్చు. ఐతే తరచూ శానిటైజ్ చేసుకోవడం కుదరని పని. నీటితో కడగకుండా, శానిటైజ్ చేసుకోకుండా ఎలా ఉంచుకోవాలనే దానికి పరిష్కారమార్గంగా...ఆల్‌ ఇన్‌ ఓజోనిట్ అనే కొత్త పరికరం పరిష్కార మార్గం చూపుతుందంటున్నారు వరంగల్ నిట్ భౌతికశాస్త్ర అధ్యాపకులు.
నిట్ భౌతిక శాస్త్ర విభాగాధిపతి ఆచార్య దినకర్ సహకారంతో సహ ఆచార్యులుడి. హరినాథ్, పరిశోథక విద్యార్ధి చందర్ రావులు సంయుక్తంగా స్టెరిలైజ్డ్ పరికరాన్ని రూపకల్పన చేశారు. ఇంట్లో ఉపయోగించే... రిఫ్రిజిరేటర్ లాంటి పరికరంలా కనిపించే ఇందులో కూరగాయలు ఇతరత్రా ఏ వస్తువలనైనా ఉంచి... ఓజోన్ వాయువును ఉత్పత్తి చేసేలా స్విచ్ ఆన్ చేస్తారు. 20-25 నిమిషాల పాటు వరకూ వస్తువులను ఓజోన్ వాయువులో ఉంచితే 99.99 శాతం అవి వివిధ రకాల వైరస్, బ్యాక్టీరియా రహితంగా మారతాయంటున్నారు నిట్ ఆచార్యులు. అతినీలలోహిత కిరణాల కంటే ఈ విధానం ఎంతో ఉపయుక్తమని చెబుతున్నారు.