ధరణి పోర్టల్ ద్వారా రిజిస్ట్రేషన్ చేసుకున్న భూమి పాసు పుస్తకంలో సంబంధం లేని వ్యక్తుల పేరు ఉందని గజ్జెల సురేశ్ అనే రైతు ఆవేదన వ్యక్తం చేశారు. వరంగల్ అర్బన్ జిల్లా భీమదేవరపల్లి మండలం వంగర గ్రామానికి చెందిన సురేశ్ తాను కొన్న భూమి పాస్ పుస్తకంలో అమ్మిన వారి పేరు, కొన్న తన పేరు కాకుండా ఇతరుల పేర్లు రావడంతో ఆశ్చర్యపోయారు. ఈ భూమిని ధరణి పోర్టల్ ద్వారా రిజిస్ట్రేషన్ చేయించుకున్నట్లు తెలిపారు. రాష్ట్ర ప్రభుత్వం ప్రతిష్ఠాత్మకంగా చేపట్టిన ధరణి పోర్టల్ ద్వారా వ్యవసాయ భూమిని నవంబర్ 28, 2020న గజ్జెల వెంకట స్వామి నుంచి కొనుగోలు చేసి స్లాట్ బుకింగ్ చేసుకున్నట్లు పేర్కొన్నారు.
గజ్జెల వెంకట స్వామి తన సర్వే నం:581/7 లోని 0.29 గుంటల భూమిని తహసీల్దార్ సబ్ రిజిస్టర్ ఆఫీసు భీమదేవరపల్లిలో ఇరువురు వేలి ముద్రలు ఇచ్చారని తెలిపారు. వెంటనే అమ్మినవారి పాస్ బుక్ నం T21010011248 నుంచి భూమి డిలీట్ అయింది. కానీ గజ్జెల సురేశ్కి పాస్ బుక్ రాకపోగా... భూమితో సంబంధం లేని కొండా సత్యనారాయణ అనే పేరుతో పాసు పుస్తకం రావటంతో రైతు ఆశ్చర్యపోయారు.