Minister Satyavathi Rathod fires on Governor: చట్టసభలు ఆమోదించిన బిల్లులను పెండింగ్లో పెట్టి.. గవర్నర్ వ్యవస్థలో తమిళిసై సౌందరరాజన్ కొత్త ఒరవడి తీసుకురావాలనుకోవడం సరికాదని మంత్రి సత్యవతి రాఠోడ్ హితవు పలికారు. చట్టసభలు ఆమోదించిన బిల్లులను పెండింగ్లో పెట్టడమంటే.. అవి పని చేయనట్టు భావించడమేనా అని ప్రశ్నించారు. మంత్రులు, ప్రభుత్వ ప్రధాన కార్యదర్శి.. గవర్నర్ను కలిసినా బిల్లులు ఆమోదం జరగలేదని చెప్పారు. వరంగల్లో ఆమె ఈ వ్యాఖ్యలు చేశారు.
"సుప్రీంకోర్టుకు పోకుండా తన చుట్టే తిరగాలన్నట్లుగా గవర్నర్ తీరు ఉంది. చట్ట సభల తీర్మానాలనే గౌరవించకుంటే దేనిని గౌరవిస్తారు. మీ చుట్టూ తిరిగితే తప్ప బిల్లులు ఆమోదించరా?. ఇదేం సంస్కృతి, ఇదేం పద్దతి. ప్రజలు ఓట్లేసి గెలిపించిన ప్రజాప్రతినిధులకు గౌరవం లేదా? గవర్నర్ వ్యవస్థకు కొత్త ఒరవడి తీసుకురావటం సరైంది కాదు. మా మంత్రులు పెండింగ్ బిల్లులపై గవర్నర్ వద్దకు వెళ్లి మాట్లాడారు. అయినా బిల్లులు ఎందుకు ఆమోదించరు." - సత్యవతి రాఠోడ్, మంత్రి
ప్రీతి ఆత్మహత్యకు కారకులైన దోషులను వదిలిపెట్టే ప్రసక్తే లేదు: వరంగల్లో ఈసారి అంతర్జాతీయ మహిళా దినోత్సవ వేడుకలను ఘనంగా నిర్వహించనున్నట్లు సత్యవతి రాఠోడ్ తెలిపారు. వివిధ రంగాల్లో ప్రతిభ కనబరిచిన వారికి రూ.లక్ష నగదు బహుమతి, ప్రశంసా పత్రాలు అందిస్తామని వివరించారు. మరోవైపు ప్రీతి ఆత్మహత్యకు కారకులైన దోషులను వదిలిపెట్టే ప్రసక్తే లేదని స్పష్టం చేశారు. ప్రీతిది హత్య, ఆత్మహత్య అన్నదానిపైన సమగ్రంగా విచారణ కొనసాగుతోందని చెప్పారు. ఇప్పటికే సైఫ్ను అరెస్ట్ చేసిన విషయాన్ని గుర్తు చేశారు. ఈ కేసుపై విచారణ నిష్పక్షపాతంగా జరుగుతుందని తెలిపారు. ప్రీతి కుటుంబసభ్యులు కోరుకునే వారిని విచారణాధికారిగా వేయడానికి సిద్ధమని సత్యవతి రాఠోడ్ పేర్కొన్నారు.
అధికారిక పర్యటనలు ఉపయోగపడతాయి:మరోవైపు రాష్ట్రప్రభుత్వం, గవర్నర్ తమిళిసై సౌందరరాజన్ల మధ్య వివాదం మరోసారి చర్చనీయాంశంగా మారింది. ఇటీవల జరిగిన శాసనసభ సమావేశాల్లో గవర్నర్ ప్రసంగంతో పరిస్థితులు చక్కబడ్డాయనుకునేలోపే.. పెండింగ్ బిల్లుల విషయమై ప్రభుత్వం సుప్రీంను ఆశ్రయించింది. ఇదే విషయంపై గవర్నర్ తమిళిసై సౌందరరాజన్ ట్విటర్ వేదికగా స్పందించారు.