ఫ్యూచర్​ సిటీగా వరంగల్​ను మారుస్తాం​: మంత్రి కేటీఆర్​

వ‌రంగ‌ల్ న‌గ‌రాన్ని అద్భుత‌మైన న‌గ‌రంగా తీర్చిదిద్దే బాధ్య‌త త‌నది అని మంత్రి కేటీఆర్ తెలిపారు. ఇవాళ వరంగల్​లో సుడిగాలి పర్యటన చేపట్టిన మంత్రి పలు అభివృద్ధి పనులకు శ్రీకారం చుట్టారు. నగరానికి మెట్రో రైలు సర్వీసును అందుబాటులోకి తెచ్చే బాధ్యత తనదని హామీ ఇచ్చారు.

వరంగల్​ నగరాన్ని ఫ్యూచర్​ సిటీగా మారుస్తామని ఐటీ, పరిశ్రమల శాఖ మంత్రి కేటీఆర్​ హామీ ఇచ్చారు. మెట్రో రైలు సర్వీసులను అందుబాటులోకి తెచ్చే బాధ్యత తమదని స్పష్టం చేశారు. వరంగల్​ అర్బన్​ జిల్లా కేంద్రంలో పర్యటించిన కేటీఆర్​ పలు అభివృద్ధి పనులకు ప్రారంభోత్సవాలు, శంకుస్థాపనలు చేశారు. అనంతరం ఖిల్లా వరంగల్​ కోటలో బహిరంగ సభలో కేటీఆర్​ పాల్గొన్నారు.

పేద ప్రజలకు అండగా..

'నగరంలో కాంగ్రెస్​ హయాంలో ఉన్న విద్యుత్​ కష్టాలకు తెరాస ప్రభుత్వం స్వస్తి చెప్పింది. గ్రామాల్లో ఇంటింటికీ తాగునీటితో పాటు, పట్టణాల్లో ప్రతి ఇంటికీ అమృత్​ జల్​ అందిస్తున్నాం. పేద విద్యార్థుల విదేశీ చదువులకు రూ. 20 లక్షలు ఇస్తున్నాం. కరోనా సంక్షోభంలోనూ పేద ప్రజల ఇంటి నిర్మాణానికి, పేదింటి ఆడపిల్లల పెళ్లికి సీఎం కేసీఆర్​ ఆసరాగా నిలబడ్డారు.'

ఐటీ, పరిశ్రమల శాఖ మంత్రి, కేటీఆర్​

ఖాతాలో డబ్బులేవి..

2014 ఎన్నికల సమయంలో భారతీయుల జన్​ధన్​ ఖాతాల్లో రూ. 15 లక్షలు వేస్తామని చెప్పిన మోదీ.. ప్రజలకు మొండి చేయి చూపించారని విమర్శించారు. డీజిల్​ ధరలపై గత ప్రభుత్వాలను విమర్శించిన ప్రధాని మోదీ.. ఇప్పుడు పెరుగుతున్న ధరలపై ఏం సమాధానం చెబుతారని ప్రశ్నించారు. రాష్ట్రానికి లక్ష కోట్ల రూపాయలు కేటాయించామన్న కేంద్ర సర్కారు.. తాము పన్నుల రూపంలో కట్టిన దాంట్లో సగమే వచ్చిందని ఎద్దేవా చేశారు.

ఇదీ చదవండి:ఏడేళ్లలో తెరాస చేసిన అభివృద్ధి శూన్యం: బండి సంజయ్​