వరంగల్ అర్బన్తో పాటు మిగతా ఐదు జిల్లాల్లో గత నెల రోజులుగా అసలు ఆహార తనిఖీలు లేవు. కారణం ఆరు జిల్లాలకు కలిపి ఉన్నది ఒకే అధికారిణి. నిబంధనల ప్రకారం ప్రతీ జిల్లాలో నెలకు కనీసం 6 చోట్ల ఆహార తనిఖీలు చేపట్టాలి. దీంతో పాటు ఫిర్యాదులు వచ్చిన చోటకు వెళ్లి తనిఖీలు చేసి నమూనాలు సేకరించి హైదరాబాద్‌లోని ప్రయోగశాలకు పంపి ఫలితం వచ్చాక చర్యలు తీసుకోవాలి. కానీ ఉమ్మడి వరంగల్‌లో ఆహార తనిఖీ అధికారి ఒక్కరే ఉన్నారు.
ఆ ఒక్కరికి కూడా వాహనం లేకపోవడంతో తనిఖీలు తన వల్ల కాదని పైఅధికారులకు చెబుతున్నారు. ఇక ఈ కార్యాలయాన్ని పర్యవేక్షించాల్సిన ఫుడ్‌ సేఫ్టీ డిజిగ్నేటెడ్‌ అధికారిణి విధులకు రాకపోవడంతో కార్యాలయంలో పనిచేయాల్సిన యూడీసీ, అటెండర్లు కూడా విధులకు ఎగనామం పెట్టి ఇళ్లకు వెళ్లిపోతున్నారు. కార్యాలయానికి కేటాయించిన వాహనం డ్రైవర్‌ కూడా విధులకు రాకపోవడంతో తనికీలకు ఉన్న ఒక్క అధికారిణి వెళ్లలేకపోతున్నారు.