తక్కువ ధరకే మాస్కులు... నకిలీ పత్రాలతో పక్కా ప్లాన్​

నాణ్యతగల మాస్కులు చవకగా అందిస్తాం. తక్కువ ధరకే మన్నికైన థర్మల్ స్కానర్లు మీ కోసం... అంటూ ప్రకటనలు గుప్పిస్తారు. తీరా సొమ్ము చెల్లించి ఆర్డర్‌ చేశాక... సరుకు రాదు. ప్రకటనదారుడి నుంచి స్పందన ఉండదు. ఇలా కరోనా వ్యాప్తిని అవకాశంగా మలుచుకుని సైబర్‌ నేరగాళ్లు రెచ్చిపోతున్నారు. మాయమాటలు చెబుతూ... చిల్లర వ్యాపారులను సైతం బురిడీ కొట్టిస్తున్నారు.

కరోనా వైరస్ వ్యాప్తి నియంత్రణలో భాగంగా... మాస్కులు, థర్మల్ స్కానర్లు, శానిటైజర్లకు డిమాండ్‌ విపరీతంగా పెరిగింది. ఇళ్లు, దుకాణాలు, వ్యాపార సముదాయాల్లో వీటిని విరివిగా వినియోగిస్తున్నారు. దీన్నే అవకాశంగా తీసుకుని... సైబర్ నేరగాళ్లు మోసాలకు పాల్పడుతున్నారు.

ప్రకటనలతో కుచ్చుటోపీ

తక్కువ ధరకే మాస్కులు, థర్మల్‌ స్కానర్లు అంటూ... ప్రకటనలతో వ్యాపారులకు కుచ్చుటోపీ పెడుతున్నారు. ఇటీవల ఫేస్‌బుక్‌లో ప్రకటన చూసి... హన్మకొండకు చెందిన ఓ వ్యాపారి ఆన్‌లైన్‌లో ఆర్డర్‌ ఇచ్చారు. వ్యాపారితో సంప్రదింపులు జరిపిన అతను నమ్మకం కుదరగానే... ఏకంగా 16 లక్షల రూపాయల సొమ్మును ప్రకటనదారుడి అకౌంట్‌కు ట్రాన్స్‌ఫర్‌ చేశాడు. అనంతరం ప్రకటనదారుడి ఫోన్‌ స్విచ్ఛాఫ్‌ వచ్చింది. మోసపోయానని గ్రహించిన పోలీసులకు ఫిర్యాదు చేశాడు.

తక్కువ ధరకే

థర్మల్‌ స్కానర్లు తక్కువ ధరకే అందిస్తామన్న ప్రకటన చూసి వరంగల్​కు చెందిన మరో వ్యాపారి 5లక్షల రూపాయలు పోగొట్టుకున్నాడు. వరంగల్‌లో నివసిస్తున్న ఒడిశా యువకులు... తక్కువ ధరకే కారు ప్రకటన చూసి... ఇంటికి వెళ్లేందుకు ఉపయోగపడుతుందని కొనుగోలు చేద్దామనుకున్నారు. తీరా కొంత సొమ్ము చెల్లించి... మోసపోయామని తెలుసుకుని సైబర్‌ పోలీసులను ఆశ్రయించారు. రాజస్థాన్‌, బీహార్‌ రాష్ట్రాలకు చెందిన ముఠాలే... మాస్క్‌లు, థర్మల్‌ స్కానర్ల పేరిట మోసాలకు పాల్పడుతున్నారని సైబర్‌ పోలీసులు చెబుతున్నారు.

వాళ్లు అక్కడి వాళ్లే

గతంలో సైబర్ నేరగాళ్లపై ఫిర్యాదులు వస్తే... పోలీసులు బృందంగా ఏర్పడి ఇతర రాష్ట్రాలకు వెళ్లి ఆ కేసులను చేధించేవాళ్లు. కానీ కరోనా కారణంగా... ప్రస్తుతం ఇతర రాష్ట్రాలకు వెళ్లడం ఇబ్బందిగా మారింది. ఇది సైబర్ నేరగాళ్లకు అనుకూలమైంది. పోలీసులు రారన్న ధీమాతో... దిల్లీ, రాజస్ధాన్, హరియాణా కేంద్రాలుగా సైబర్‌ నేరగాళ్లు మోసాలకు తెరలేపుతున్నారు. చిన్న స్థాయి వ్యాపారులను లక్ష్యంగా చేసుకుని ప్రకటనల ద్వారా వల వేస్తున్నారు.

ప్రకటనలు చూసి మోసపోవద్దని.. వారు అందించే వివరాలు సరైనవో కాదో ఒకటికి రెండుసార్లు ధ్రువీకరించుకోవాలని పోలీసులు చెబుతున్నారు. అనుమానం వస్తే వెంటనే తమకు ఫిర్యాదు చేయాలని సూచిస్తున్నారు.

ఇవీ చూడండి:కరోనాతో టీ ఫైబర్​ ఆవశ్యకత మరింత పెరిగింది: మంత్రి కేటీఆర్​