మేడారం హుండీ ఆదాయమెంత? విదేశీ నాణేల లెక్కెంత!?

గలగలమంటున్న నాణాలను కుప్పలు కుప్పలుగా పోశారు. జల్లెడ పడుతున్నారు. ఆ వడపోతలో బంగారు ఆభరణాలు బాగానే వస్తున్నాయి. రెండు తులాల ముక్కెర, పలు ఆభరణాలు అమ్మలకు భక్తులు సమర్పించారు. మేడారం జాతరలో భక్తులు వేసిన నోట్ల లెక్కింపు ఇప్పటికే పూర్తైంది. ప్రస్తుతం సిబ్బంది బంగారు, వెండి ఆభరణాలు, చిల్లర నాణాల లెక్కింపు ప్రక్రియ చేపట్టారు.

మేడారం జాతర హుండీల లెక్కింపు తుది దశకు చేరుకుంది. గద్దెల వద్ద ఏర్పాటు చేసిన 494 హుండీలను తెరిచి లెక్కిస్తున్నారు. కరెన్సీ నోట్ల లెక్కింపు ప్రక్రియ ఇప్పటికే పూర్తైంది. జాతర ఆఖరిరోజు భారీవర్షం కారణంగా కొన్ని హుండీలు తడిశాయి. అందులో నోట్లు తడిసి ముద్ద కావడం వల్ల నోట్ల లెక్కింపు ఆలస్యమైంది.

ఇప్పటికే 11 కోట్లు

ఇప్పటివరకూ 11 కోట్ల 17 లక్షల 99 వేల 985 రూపాయలు హుండీల ద్వారా ఆదాయం సమకూరింది. నోట్ల లెక్కింపు పూర్తైందని.. ఇప్పుడు భక్తులు వేసిన చిల్లర నాణాలను లెక్కింపు చేస్తున్నామని అధికారులు తెలిపారు. రూపాయి, రెండు, ఐదు, పది, రూపాయల నాణాలతోపాటు విదేశీ కరెన్సీ నాణాలు కుప్పలుగా పోసి లెక్కిస్తున్నారు. ఒడిబియ్యం జల్లెడ పట్టి చిక్కుకున్న చిల్లరను జాగ్రత్తగా వేరు చేస్తున్నారు.

ఆభరణాల లెక్కింపు కూడా..

భక్తులు వనదేవతలకు సమర్పించిన బంగారు, వెండి ఆభరణాల లెక్కింపు కూడా చేపట్టారు. దాదాపు రెండు తులాల బరువున్న ముక్కెరతోపాటు.. భక్తులు సమర్పించిన ఇతర ఆభరణాలను ముందుగా వేరు చేశారు. బియ్యం, నాణాల మధ్యలో చిక్కిన బంగారు, వెండి ఆభరణాలు సైతం వేరు చేస్తున్నారు. ఆ తరువాత వాటి విలువను లెక్కిస్తారు.

గత జాతర సందర్భంగా పదికోట్ల రూపాయల ఆదాయం రాగా... అది ఇప్పటికే దాటింది. నాణాలు, బంగారు, వెండి ఆభరణాలు అన్నీ కలుపుకుని.. మేడారం జాతర ఆదాయం ఎంత వచ్చిందనేది సోమవారం సాయంత్రం అధికారులు వెల్లడించనున్నారు.

ఇదీ చూడండి :భారీ నగదున్న బ్యాగ్ మాయం.. పోలీసుల వేట