ఆంక్షలను కఠినంగా అమలు చేయాలి: సీఎం కేసీఆర్‌

రాష్ట్రంలోని కొన్ని ప్రాంతాల్లో లాక్‌డౌన్‌ పటిష్ఠంగా అమలు కావడం లేదని ముఖ్యమంత్రి కేసీఆర్‌ అసంతృప్తి వ్యక్తం చేశారు. ఆంక్షల్ని కఠినంగా అమలు చేయాల్సిన బాధ్యత డీజీపీ సహా కలెక్టర్లపై ఉందని స్పష్టంచేశారు. యాదాద్రి, నాగర్‌కర్నూల్‌ సహా కొన్ని జిల్లాల్లో కొవిడ్ కేసుల సంఖ్య తగ్గడం లేదన్న సీఎం... ఆయా జిల్లాల్లో వైద్యాగ్యశాఖ కార్యదర్శి రిజ్వీ పర్యటించాలని ఆదేశించారు. మరికొద్ది రోజుల్లో రోహిణి కార్తె ప్రవేశిస్తుందని... మరో పరిరోజుల్లో ధాన్యం కొనుగోళ్లు పూర్తి చేయాలని సీఎం స్పష్టం చేశారు. ఆర్టీసీ డ్రైవర్లు, కండక్టర్లు, కూరగాయాల వ్యాపారులు, సేల్స్‌మెన్స్‌తో కూడిన సూపర్‌ స్ప్రైడర్ల జాబితా రూపొందించాలని.. వారికి త్వరలోనే వ్యాక్సిన్‌ ఇస్తామని సీఎం తెలిపారు.

రెవెన్యూ నష్టాన్ని లెక్కచేయకుండా లాక్‌డౌన్‌ అమలు చేస్తున్నామని... ఆంక్షలను కఠినంగా అమలు చేయాలని సీఎం కేసీఆర్‌ స్పష్టంచేశారు. వరంగల్‌ కలెక్టరేట్‌ నుంచి అన్ని కలెక్టర్లు, ఎస్పీలు, వైద్యాధికారులతో వీడియో కాన్ఫరెన్స్‌ నిర్వహించారు. ఎంజీఎం ఆస్పత్రి సమీపంలోనే ఉన్న సెంట్రల్ జైల్‌ను తరలించి... అక్కడ అత్యాధునిక మల్టీ స్పెషాలిటీ దవాఖానాను నిర్మిస్తామని తెలిపారు. చర్లపల్లి తరహాలో వరంగల్‌లో కొత్తగా ఓపెన్‌ ఎయిర్‌ జైలు నిర్మిస్తామన్నారు. జిల్లాల్లో కరోనా పరిస్థితులపై అధికారుల్ని ఆరా తీశారు. కరోనా కట్టడి కోసం అమలు చేస్తున్న కార్యాచరణ ఏమిటని అడిగి తెలుసుకున్నారు. లాక్‌డౌన్‌ను కఠినంగా అమలు చేసే బాధ్యత డీజీపీతో సహా కలెక్టర్లపై ఉందని స్పష్టంచేశారు. కొన్ని జిల్లాల్లో లాక్‌డౌన్‌ కఠినంగా అమలు కావడం లేదని సీఎం అసంతృప్తి వ్యక్తంచేశారు. సడలింపు సమయం తప్ప... మిగతా 20 గంటలు లాక్‌డౌన్‌ కఠినంగా అమలు చేయాలని తేల్చిచెప్పారు. ఉదయం 10 గంటల 10 నిమిషాల తర్వాత తర్వాత పాస్‌ హోల్డర్స్ తప్పా... మరెవ్వరూ రోడ్డు మీద కనిపించకుండా డీజీపీ కఠిన చర్యలు చేపట్టాలని ఆదేశించారు. గ్రామాల్లో లాక్‌డౌన్‌ పటిష్ఠంగా అమలవుతోందని... పట్టణాలు, నగరాల్లో ప్రజాప్రతినిధులు కూడా చొరవ తీసుకోవాలన్నారు.

ఆ జిల్లాల్లో కేసులు తగ్గడం లేదు

యాదాద్రి, నాగర్‌కర్నూల్‌ సహా కొన్ని జిల్లాల్లో కోవిడ్ కేసుల సంఖ్య తగ్గడం లేదన్నారు. వైద్యాగ్యశాఖ కార్యదర్శి రిజ్వీ.... ఆయా జిల్లాలకు స్వయంగా వెళ్లి పరిస్థితులను సమీక్షించాలని ఆదేశించారు. ఇతర రాష్ట్రాల సరిహద్దుల్లో ఉన్న జిల్లాల కలెక్టర్లు... కరోనా కట్టడి విషయంలో ప్రత్యేక శ్రద్ధ వహించాలన్నారు. మొదటి జ్వర సర్వేకు కొనసాగింపుగా రెండో విడత చేపట్టాలని చెప్పారు. పరిశుభ్రత మీద కలెక్టర్లు ప్రత్యేక శ్రద్ధ తీసుకోవాలని.... కొవిడ్ ఆస్పత్రుల్లో చెత్తను తీసేందుకు స్పెషల్‌ డ్రైవ్‌ చేపట్టాలని సూచించారు. కొవిడ్ ఆసుపత్రుల్లో సేవలందిస్తున్న అన్నిరకాల పొరుగుసేవల సిబ్బంది సమస్యల పరిష్కారం కోసం త్వరలో కేబినెట్‌లో నిర్ణయం తీసుకుంటామన్నారు. ఆర్టీసీ డ్రైవర్లు, కండక్టర్లు, కూరగాయాల వ్యాపారులు, సేల్స్‌మెన్‌ తదితరులందరితో సూపర్‌ స్ప్రైడర్ జాబితా రూపొందించాలన్నారు. వారికి త్వరలోనే వ్యాక్సిన్‌ ఇస్తామని చెప్పారు. తాను హెలీకాప్టర్‌లో వస్తున్న సందర్భంలో రోడ్లమీద వడ్ల కుప్పలు ఆరబోసి కనిపించాయన్నారు. మరికొద్ది రోజుల్లో రోహిణి కార్తె ప్రవేశించనున్న నేపథ్యంలో వ్యవసాయ పనులు ఊపందుకుంటాయని... ధాన్యం కొనుగోళ్లు మరో వారంలో పూర్తి చేయాలని సీఎం ఆదేశించారు.

ఇదీ చదవండి:అన్ని విధాలా అండగా ఉంటాం: సీఎం కేసీఆర్​