KCR Aerial Survey Schedule: గోదావరి పరీవాహక ప్రాంతంలో ముఖ్యమంత్రి కేసీఆర్ ఏరియల్ సర్వే రెండ్రోజుల పాటు కొనసాగనుంది. ఆదివారం ఉదయం భద్రాచలం, ఏటూరు నాగారం ప్రాంతాలను విహంగవీక్షణం ద్వారా పరిశీలించనున్న సీఎం.... సోమవారం ఎస్సారెస్పీ, కడెం, కాళేశ్వరం తదితర వరద ప్రభావిత ప్రాంతాల్లో పర్యటిస్తారు. ఇందుకోసం ఇవాళ సాయంత్రం సీఎం ప్రత్యేక బస్సులో రోడ్డుమార్గం ద్వారా వరంగల్‌లోని కెప్టెన్‌ లక్ష్మి కాంతారావు ఇంటికి చేరుకున్నారు. సీఎస్‌ సోమేశ్‌ కుమార్, వైద్య ఆరోగ్యశాఖమంత్రి హరీశ్‌రావు, ఎంపీ సంతోష్‌ కుమార్, ఎమ్మెల్సీలు మధుసూదనాచారి, పల్లా రాజేశ్వర్‌రెడ్డి వివిధ శాఖల అధికారులు సీఎం వెంట ఉన్నారు.
వరంగల్‌లో మంత్రులు, ఎమ్మెల్యేలు, ప్రజాప్రతినిధులు, ఉన్నతాధికారులతో సమావేశమైన సీఎం.. వరంగల్‌ ప్రాంతంలో వరద పరిస్థితిపై సమీక్షించారు. మంత్రులు ఎర్రబెల్లి దయాకర్‌రావు, సత్యవతి రాఠోడ్‌, ఎంపీలు, ఎమ్మెల్యేలు సమావేశంలో పాల్గొన్నారు. రేపు ఉదయం వరంగల్‌ నుంచి భద్రాచలం వరకు హెలికాప్టర్‌ ద్వారా ఏరియల్ సర్వే నిర్వహిస్తారు. భద్రాచలంలో క్షేత్రస్థాయిలో పర్యటించనున్న కేసీఆర్... వరద ముంపు వల్ల సంభవించిన నష్టం, చేపడుతున్న సహాయక చర్యలపై మంత్రి పువ్వాడ అజయ్, ఎమ్మెల్యేలు, ప్రజాప్రతినిధులు, అధికారులతో సమీక్షించనున్నారు.
భద్రాచలంలో పర్యటించి, వరద ముంపు వల్ల సంభవించిన నష్టం, చేపడుతున్న వరద సహాయక చర్యలపై స్థానిక మంత్రి పువ్వాడ అజయ్ కుమార్, ఎమ్మెల్యేలు, ప్రజా ప్రతినిధులు, అధికారులతో సమీక్ష నిర్వహిస్తారు. అక్కడి నుంచి ఏటూరు నాగారం ప్రాంతంలో ఏరియల్ సర్వే చేపట్టి వరద సహాయక చర్యలపై సీఎం సమీక్షిస్తారు. ముఖ్యమంత్రి కేసీఆర్ ఏటూరునాగారం నుంచి హైదరాబాద్కు చేరుకుంటారు. సికింద్రాబాద్ ఉజ్జయిని మహంకాళి బోనాల ఉత్సవాల్లో సీఎం కేసీఆర్ పాల్గొంటారు. ఉత్తర తెలంగాణలోని ఎస్సారెస్పీ, కడెం,కాళేశ్వరం, వరదబాధిత ప్రాంతాలలో సీఎం కేసీఆర్ ఏరియల్ సర్వే చేపట్టనున్నారు.