వేయి స్తంభాల గుడిలో ఘనంగా బతుకమ్మ వేడుకలు

ఓరుగల్లులో తొలిరోజు ఎంగిలిపూల బతుకమ్మ వేడుకలు ఘనంగా ప్రారంభమయ్యాయి. వేయి స్తంభాల గుడిలో జరిగిన వేడుకల్లో మహిళలు అధిక సంఖ్యలో పాల్గొని బతుకమ్మ పాటలు పాడుతూ ఆటలు ఆడారు.

వరంగల్​లో బతుకమ్మ వేడుకలు అదరహో అనిపించేలా ఆద్యంతం కనువిందుగా సాగాయి. ఉదయం నుంచి పూల సేకరణలో నిమగ్నమైన మహిళలు... అందంగా ఏర్చి కూర్చిన బతుకమ్మలను నెత్తిన పెట్టుకుని వేయి స్తంభాల గుడి బాట పట్టారు. ఉదయం ఆరు నుంచే గుడి పరిసరాలన్నీ యువతులు, మహిళలు, చిన్నారులతో కిక్కిరిసిపోయాయి.
మహిళలు సంప్రదాయబద్ధంగా తయారై... బతుకమ్మలతో ఆలయానికి తరలి వచ్చారు. బతుకమ్మలను ఒక్క చోట పేర్చి గౌరమ్మకు పూజలు చేశారు. అనంతరం ఆటపాటలతో సందడి చేశారు. చిన్నా పెద్ద భేదాభిప్రాయాలు మరచి బతుకమ్మ చుట్టూ ఆడి పాడారు. గతంతో పోలిస్తే ఈ ఏడాది పండుగ బాగా జరిగిందని మహిళలు తెలిపారు.
పండుగను జరుపుకునేందుకు సింగపూర్ ​నుంచి వచ్చామని... ఇక్కడ వేడుక జరుపుకోవడం చాలా సంతోషంగా ఉందని పలువురు తెలిపారు. తెలంగాణ రాష్ట్రంగా ఏర్పడినప్పటినుంచి ఈ సంబురాలు మరింత శోభను సంతరించుకుంటున్నాయని వెల్లడించారు.

వేడుకల్లో ఎలాంటి అవాంఛనీయ ఘటనలు తలెత్తకుండా పోలీస్ శాఖ పటిష్ఠ చర్యలు చేపట్టింది. వేయి స్తంభాల గుడి ఆవరణలోకి కుర్రకారును అనుమతించకుండా జాగ్రత్తలు తీసుకున్నారు. మొదటిరోజు ఎంగిలి పూల బతుకమ్మ వేడుకలు ముగియగా... రెండు రోజు అటుకుల బతకమ్మను జరిపేందుకు మహిళలు సన్నద్ధమవుతున్నారు. నైవేద్యాలు పంచుకుని... చల్లంగా చూడమ్మా గౌరమ్మా అంటూ మొక్కుకుని ఇంటి బాట పట్టారు.

ఇవీ చూడండి: రాష్ట్ర వ్యాప్తంగా కన్నుల పండువగా బతుకమ్మ వేడుకలు