ఆదుకోండయ్యా..: 25 ఏళ్ల కుమారుడికి.. 10 ఏళ్లుగా అన్నీ తానై..

Mother Suffering Due to Son Illness: చిన్న వయస్సులోనే చిన్నారులకు అంతు చిక్కని వ్యాధులు వస్తే.. ఆ కుటుంబంలో ఆనందమంతా ఆవిరైపోతుంది. వ్యాధి నయం చేయించడానికి ఆ తల్లిదండ్రులు ఎన్నో ప్రయత్నాలు చేస్తారు. ఇక్కడ ఈ తల్లీ అదే చేసింది. నడవలేని కుమారుడికి అన్నీ తానై చూసుకుంటుంది. తన బిడ్డ వైద్యానికి ఎవరైనా సహాయం చేయాలని వేడుకుంటోంది.

Mother Suffering Due to Son Illness: అనారోగ్యం కారణంగా మంచానికే పరిమితమైన కుమారుడిని చూసి ఆ తల్లి తల్లడిల్లిపోతుంది. ఉన్నదంతా పెట్టి అందినకాడికి అప్పులు చేసి చికిత్స చేయించింది. అయినా పరిస్థితిలో ఎలాంటి మార్పు కనిపించడం లేదు. వైద్య ఖర్చులు భరించే స్థోమత లేక.. కుమారుడి దీనస్థితిని చూడలేక ప్రస్తుతం ఆ తల్లి కుమిలిపోతుంది. కూలీనాలి చేస్తే వచ్చే డబ్బులతో పూట గడవడమే కష్టంగా మారిన కష్ట సమయంలోనూ ఎలాగోలా పిల్లల కడుపు నింపుకుంటూ వచ్చింది. ఇప్పుడు ఆ తల్లి కాలు పట్టు తప్పడంతో పనికి వెళ్లలేని పరిస్థితి ఏర్పడింది.

నవ మాసాలు మోసి కన్న కుమారుడికి పాతికేళ్లు వచ్చినా.. అతడిని ఇంకా ఆ తల్లి మోయాల్సి వస్తోంది. అతడికి అనారోగ్యం కారణంతో అన్ని పనులూ ఆమే చేయాల్సి వస్తోంది. చదువుకుంటున్న ఇద్దరు కుమార్తెల పోషణ భారమూ ఆమెదే. ఆ తల్లికి వయసు పైబడుతుండటంతో పిల్లల భవిష్యత్తుపై బెంగతో నలిగిపోతుంది. వివరాల్లోకి వెళితే.. వరంగల్​కు చెందిన మహ్మద్ సాదిక్​షాషా, తస్లీమాలు దంపతులు. వారికి 26 ఏళ్ల కిందట వివాహమైంది. ఈ దంపతులకు ముగ్గురు సంతానం. అయితే కుమారుడు యాకూబ్​షాషా (25) పెద్దవాడు. కుమార్తెలు సనా (16), ఖాజాబీ (15). వరంగల్​లో నివాసముండే ఈ కుటుంబం బతుకుదెరువు కోసం తొర్రూరుకు వచ్చింది. అక్కడే పనులు చేసుకుంటూ జీవనం సాగిస్తున్నారు.

అంతా సాఫీగా సాగుతున్న సమయంలో.. 11 సంవత్సరాల కిందట ఒకరోజు భార్యభర్తలు గొడవ పడుతుంటే.. అడ్డు వెళ్లిన కుమారుడు కిందపడిపోవడంతో అతడి నడుము భాగం దెబ్బతింది. నడవడానికి వీళ్లేకుండా రెండు కాళ్లు చచ్చుబడిపోయి కదల్లేని పరిస్థితి ఏర్పడింది. తర్వాత ఏడాదికే భర్త సాదిక్​షాషా.. భార్యా పిల్లలను వదిలేసి వెళ్లిపోయాడు. అప్పటి నుంచీ కుటుంబ భారం మొత్తం తల్లి తస్లీమాపైన పడింది. ఒక పక్క కదలలేని కుమారిడికి సపర్యలు చేస్తూనే.. ఇళ్లల్లో పనులు చేస్తూ కుటుంబాన్ని నెట్టుకొస్తుంది. ఆమెకు, కుమారుడికి ప్రభుత్వం పింఛను ఇస్తుండటంతో కాస్త ఊరటగా ఉండేది.

కుమారుడి అనారోగ్యం కారణంగా అద్దె ఇల్లు కూడా దొరకట్లేదు: ఇటీవల ఆమె కాలు పట్టుతప్పి కిందపడిపోవడంతో పనికి వెళ్లలేని స్థితి నెలకొంది. అప్పటి నుంచి ఆర్థిక కష్టాలు ఆమెను చుట్టుముడుతున్నాయి. కుమారుడికి ఫిజియోథెరపీ చేస్తే నడక వస్తుందని వైద్యులు సూచించినట్లు తస్లీమా తెలిపింది. అందుకు నెల నెలా రూ.10 వేలు ఖర్చవుతుందనడంతో ఆమెకు స్థోమత లేక ఊరుకున్నామని చెప్పారు. కుమారుడి అనారోగ్యం కారణంగా వారికి అద్దె ఇల్లు కూడా దొరకడం కష్టంగా ఉందని వాపోయారు. కుమారుడి వైద్యానికి దాతలెవరైనా సాయం చేయాలని, ప్రభుత్వం తమకు ఇల్లు మంజూరు చేెయాలని తస్లీమా వేడుకుంటున్నారు.

ఇవీ చదవండి: