ఎన్ని వసతులు, సౌకర్యాలు ఉన్నా... ఆత్మవిశ్వాసం లేకపోతే అనుకున్నది సాధించలేం. సాధించాలన్న పట్టుదల, అచంచలమైన నమ్మకం ఉన్నప్పుడు ఎన్ని ఇబ్బందులున్నా దూదిపింజలా ఎగిరిపోతాయి. ఇందుకు చక్కని ఉదాహరణ వరంగల్‌కు చెందిన ఏడేళ్ల చిన్నారి మిథున. బాస్కెట్ బాల్ క్రీడాకారిణి కావాలనేది తన కల. తానొకటి తలిస్తే... విధి మరొకటి చేసింది. విద్యుదాఘాతంతో ఏడాది క్రితం మిథున కుడి చేయి కోల్పోయింది. ఎడమ చేతి మూడు వేళ్లూ కాలిపోయాయి. ఆస్పత్రిలో చాలా రోజులు చికిత్స తీసుకుని కోలుకుంది. చేయి లేకపోవడం వల్ల బాస్కెట్‌బాల్‌పై ఇష్టాన్ని వదులుకోమని చాలామంది చెప్పిచూశారు. కానీ ఎవరెంత చెప్పినా వినకుండా.... బాస్కెట్‌బాల్‌ శిక్షణ పొందుతోంది. వేకువజామునే వరంగల్లోని జేఎన్ఎస్ మైదానానికి వెళ్లి... రెట్టించిన ఉత్సాహంతో సాధన చేస్తూ ఔరా అనిపిస్తోంది.
బాలిక పట్టుదలను చూసి.. కోచ్ ప్రత్యేక శిక్షణ
మిథున పట్టుదలను గమనించిన బాస్కెట్ బాల్ కోచ్ ప్రశాంత్... ప్రత్యేక శిక్షణనిస్తున్నారు. చిన్నారి కోసం మరింత ఎక్కువ సమయం కేటాయించి మెలకువలు నేర్పిస్తున్నారు.
'మిథున చాలా కష్టపడుతుంది. కొన్ని మెలకువలు కూడా నేర్చుకుంది. చెయ్యి లేదు అనే ఫీలింగ్ కూడా లేదు. నేను ఏది చేసి చూపిస్తే తాను అది చేస్తుంది. తన పట్టుదలను చూసి ప్రతి రోజు తెల్లవారుజాము 6గంటలకు గ్రౌండ్కు వచ్చి నేర్పిస్తున్నా.. నాకంటే ముందే గ్రౌండ్కు వచ్చి సిద్ధంగా ఉంటుంది. దివ్యాంగులు ఏమీ చేయలేమనే భయం వద్దు. ఇప్పుడు పారా ఒలింపిక్స్ కూడా ఉన్నాయి. ఎవరైనా నేర్చుకోవాలి అనుకునేవారికి ఉచితంగా శిక్షణ కూడా ఇస్తాం.'
- ప్రశాంత్, శిక్షకుడు