మంచానికే పరిమతమైన యువకుడు.. సాయం కోసం ఎదురుచూపులు

Seeking For Help: పాతికేళ్ల యువకుడు. చలాకీగా తిరుగుతూ ఉద్యోగం చేస్తూ పెళ్లి చేసుకొని హాయిగా ఉండాల్సిన జీవితం. కానీ విధి వక్రీకరించింది. రోడ్డు ప్రమాదం వెన్నెముక విరిగి మంచానికే పరిమితమయ్యాడు. ఏడు పదులు దాటిన నానమ్మే సపర్యలు చేస్తూ సాకుతోంది. కటిక పేదరికంతో వైద్యానికి డబ్బులు లేక నరకయాతన అనుభవిస్తున్నాడు.

సాయం కోసం ఎదురుచూపులు

Seeking For Help: వరంగల్‌ తూర్పు కోట సమీపంలోని యాదవనగర్‌కు చెందిన కుక్కల శివ జీవితం రెండున్నరేళ్ల వరకు హాయిగా గడచిపోయింది. చిన్నపాటి ఉద్యోగం చేస్తూ పేదలైన అమ్మానాన్నలకు ఆసరాగా ఉండేవాడు. ఓ రోజు బైక్‌పై స్నేహితుడి వివాహానికి వర్ధన్నపేటకు వెళ్లి తిరిగి వస్తుండగా, ఓ గుంత వల్ల శివ ప్రమాదానికి గురయ్యాడు. కింద పడగానే వెన్నెముక విరిగింది. హనుమకొండలోని ఒక ప్రైవేటు ఆసుపత్రిలో శస్త్రచికిత్స జరిగింది. అప్పుడు రూ. 80 వేల వరకు ఖర్చయ్యింది. అయినా కూడా శివ పరిస్థితి బాగు పడలేదు.

మరింత కోలుకోవాలంటే..

తర్వాత ఆరు నెలల పాటు హైదరాబాద్‌లో ఫిజియో థెరపీ చేయించాల్సి వచ్చింది. అప్పుడు మరో రూ. 2 లక్షల వరకు ఖర్చయ్యింది. అప్పటి వరకు కనీసం అడుగు వేయలేని పరిస్థితి ఉండేది. ఫిజియోథెరపీ తర్వాత శివ తనంతట తానుగా చక్రాల కుర్చీలో కూర్చోగలుగుతున్నాడు. శివ ఆరోగ్యం మరింత కోలుకోవాలంటే మరో ఆరు నెలల పాటు చికిత్స అవసరం.

శివ వయసు పాతికేళ్లు. అమ్మానాన్న కుమారస్వామి కోమల హైదరాబాద్‌ ఘట్​కేసర్​లో కూలీలుగా చేస్తూ డబ్బులు పంపిస్తున్నారు. 75 ఏళ్ల వృద్ధురాలు కనకమ్మ శివ నాయనమ్మ. మనువడి పరిస్థితిని చూసి దుఃఖాన్ని దిగమింగుకొని కనకమ్మ వండిపెడుతూ సపర్యలు చేస్తోంది. శివ లేవలేకపోవడంతో వైద్యులు యూరిన్‌ పైపు అమర్చారు. కానీ యూరిన్‌ బ్యాగు కొనలేని కడుపేదరికంలో మగ్గుతున్నారు. మూత్రాన్ని ఒక సీసాలోకి పడుతున్నారు. మరో ఆరు నెలలు వైద్యం అందిస్తే శివ బాగయ్యే అవకాశం ఉందని వైద్యులు చెప్పారు. దాతలు ముందుకొచ్చి ఆదుకోవాలని వీరు కోరుతున్నారు.

శివకు మరో ఆరు నెలలు ఫిజియో థెరపీ చేయిస్తే కోలుకునే అవకాశం ఉంది. వైద్యానికి మరో రెండు లక్షల రూపాయలు ఖర్చయ్యే అవకాశం ఉంది. దాతలు ముందుకు వచ్చి వైద్యం చేయిస్తే కోలుకునే పరిస్థితి ఉంది.

ఇదీ చూడండి:'మనవడి వైద్యం ఖర్చు భారమవుతోంది.. సాయం చేయండి'