వరంగల్‌లోని జాతీయ సాంకేతిక విద్యాసంస్థ-నిట్ రిజిస్ట్రార్(NIT registrar) ఎస్.గోవర్ధన్‌రావును నిబంధనలకు విరుద్ధంగా కొనసాగిస్తున్నారని కేంద్రానికి ఫిర్యాదులు అందాయి. ఎన్ఐటీ పూర్వ విద్యార్థి, మహబూబాబాద్ ఎమ్మెల్యే శంకర్నాయక్ (MLA Shankar naik), మరో పూర్వ విద్యార్థి దినేశ్ రెడ్డిలు ఈ మేరకు కేంద్ర విద్యాశాఖకు, ప్రధానికి లేఖలు రాశారు. ఉద్యోగ నియామకాలు, నిధుల వినియోగంలోనూ రిజిస్ట్రార్ పలు అవకతవకలకు పాల్పడ్డారని ఆరోపిస్తూ చర్యలు తీసుకోవాలని కోరారు.
బాబా అటామిక్ రీసెర్చ్ కేంద్రం (Baba Atomic Research Center) నుంచి డిప్యుటేషన్‌పై వచ్చిన రిజిస్ట్రార్ ఏడాది ఆగస్టు 31న ఆయన పదవీ విరమణ పొందాల్సి ఉంది. అయితే ఆయన పదవీకాలాన్ని మరో నాలుగేళ్లు పెంచుతూ ఎన్ఐటీ 'బోర్డ్ ఆఫ్ గవర్నర్స్ (Board of Governors)' నిర్ణయం తీసుకొంది. గోవర్ధన్ రావు డిప్యుటేషన్‌ను బార్క్ పొడిగించలేదని, అలాంటప్పుడు ఎన్ఐటీలో ఆయన పదవీకాలాన్ని పెంచే అధికారం 'బోర్డ్ ఆఫ్ గవర్నర్స్ (Board of Governors)కు ఎలా ఉంటుందని ఉద్యోగవర్గాలు ప్రశ్నిస్తున్నాయి. రిజిస్ట్రార్ బార్క్ నుంచి వచ్చినందున ఆ సంస్థకు చెందిన అనేక మందికి నిట్‌లో కీలక పోస్టులు కట్టబెట్టారని, పలువురు పదవీ విరమణ పొందిన సిబ్బందిని తీసుకొచ్చి భారీగా వేతనాలు చెల్లిస్తున్నారని ఆరోపిస్తున్నారు.
రిజిస్ట్రార్ కొనసాగింపులో నిబంధనలు ఉల్లంఘించలేదని నిట్ సంచాలకుడు ఆచార్య ఎన్వీ రమణారావు తెలిపారు. ఎమ్మెల్యే శంకర్నాయక్ (MLA Shankar naik) లేఖపై కేంద్రానికి సమాధానం ఇచ్చామని తెలిపారు. కొందరు సిబ్బంది అక్రమాలను కట్టడి చేయడంతో పనిగట్టుకొని లేఖలు రాయిస్తున్నారని ఆరోపించారు.
ఇదీ చూడండి:WARANGAL NIT: ఎన్ఐఆర్ఎఫ్ ర్యాంకింగ్లో వరంగల్ నిట్కు 23వ ర్యాంక్