సొంతూళ్లో కరోనా కట్టడి చర్యల్లో ఎర్రబెల్లి

ఎలా ఉన్నారు..? బాగున్నారా..? కరోనా వ్యాప్తి కట్టడికి ఏం చేస్తున్నారు..? ఇగో ఈ మాస్కు కట్టుకో... చేతులు శుభ్రంగా కడుక్కుంటున్నారా..? ప్రభుత్వ ఇచ్చే బియ్యం అందాయా..? అంటూ ఆప్యాయంగా పలకరిస్తున్నారు. కాసేపటి తర్వాత వీధుల్లో సోడియం హైపో క్లోరైడ్​ రసాయనాన్ని పిచికారి చేస్తూ కనిపించారు. ఎవరనుకుంటున్నారు... మంత్రి ఎర్రబెల్లి దయాకరరావు.

ఉన్న ఊరు కన్న తల్లితో సమానం అంటారు. ఏమి చేసినా తల్లి రుణం తీర్చుకోలేనిదంటారు. అయినా ఎంతో కొంత చేయాలనే సంకల్పంతో మంత్రి ఎర్రబెల్లి దయాకరరావు స్వగ్రామంలో సేవలందిస్తున్నారు. వరంగల్​ గ్రామీణ జిల్లా పర్వతగిరి ఆయన పుట్టిన ఊరు. కరోనా వ్యాప్తి కారణంగా ప్రభుత్వం తీసుకున్న లాక్​డౌన్​ నిర్ణయానికి అనుగుణంగా ఇంటి వద్దే ఉంటూ పరిమితి మేరకు ఊర్లో పర్యటిస్తూ... ప్రజలకు అవగాహన కల్పిస్తున్నారు.

పర్వతగిరిలోనే ఉంటూ జిల్లావ్యాప్తంగా పర్యటిస్తున్నారు ఎర్రబెల్లి. అధికారులతో సమీక్షిస్తూ... సీఎం కేసీఆర్​ ఆదేశాల మేరకు ప్రజల్ని చైతన్య పరుస్తూ... నేనున్నా అనే భరోసా కల్పిస్తున్నారు. వీధుల్లో సోడియం హైపోక్లోరైడ్​ రసాయనం పిచికారి చేస్తూ... ఇంటింటికీ మాస్కులు అందిస్తూ... జాగ్రత్తలు చెబుతున్నారు. ప్రభుత్వం అందించే బియ్యం పంపిణీపై ఆరా తీస్తున్నారు. కరోనా కట్టడికి స్వీయ నియంత్రణే ముఖ్యమన్న ఎర్రబెల్లి... కేంద్ర, రాష్ట్ర ప్రభుత్వాల లాక్​డౌన్​ నిర్ణయం చాలా గొప్పదని కొనియాడారు.

ఇదీ చూడండి:కరోనాపై పోరాటానికి రామోజీ సంస్థల భారీ విరాళం