'పరిసరాలు శుభ్రంగా ఉంచాలి.. ప్రజలు అప్రమత్తంగా ఉండాలి'

వరంగల్ గ్రామీణ జిల్లా రాయపర్తి మండలం మైలారంలో నిరుపేదలకు పంచాయతీ రాజ్ శాఖ మంత్రి ఎర్రబెల్లి దయాకర్ రావు కిరాణ సామగ్రి పంపిణీ చేశారు. కరోనా విజృంభిస్తోన్న నేపథ్యంలో ప్రజలు అప్రమత్తంగా ఉండాలని మంత్రి సూచించారు.

లాక్​డౌన్ వల్ల ఇబ్బందులు ఎదుర్కొంటున్న పేదలకు దాతలు సహకరించాలని పంచాయతీ రాజ్ మంత్రి ఎర్రబెల్లి దయాకర్ రావు అన్నారు. వరంగల్ గ్రామీణ జిల్లా రాయపర్తి మండలం మైలారం గ్రామంలోని నిరుపేదలకు నిత్యావసర సరుకులు అందజేశారు. కరోనా వల్ల అన్ని వ్యవస్థలు కుదేలయ్యాయని మంత్రి ఎర్రబెల్లి ఆందోళన వ్యక్తం చేశారు. ఫలితంగా ఆర్ధిక వ్యవస్థ ఇబ్బందిగా మారిందన్నారు. పల్లెల్లో కంటే పట్టణాల్లోనే కరోనా ఇబ్బందికరంగా మారిందన్నారు.

సర్కార్ అన్ని విధాలా ఆదుకుంటుంది !

రైతులకు ఇబ్బందులు కలగకుండా ప్రభుత్వం అన్ని విధాలా ఆదుకుంటుందన్నారు. రైతులకు ప్రతి గ్రామంలో కల్లాలు ఏర్పాటు చేసేందుకు ప్రణాళికలు సిద్ధం చేస్తున్నామన్నారు. రాబోయేది వానాకాలమే కాబట్టి విషజ్వరాలు కరోనాకు దారి తీస్తుందన్నారు. ప్రతి గ్రామం, ఇల్లు, పరిసర ప్రాంతాల్లో పరిసరాలు శుభ్రంగా ఉంచుకోవాలన్నారు. కరోనా బారిన పడకుండా గ్రామాలన్నీ కలిసికట్టుగా ఉండాలని స్పష్టం చేశారు.

ఇవీ చూడండి : 'నేతన్నలకు సాయం చేసే ఆలోచనేమైనా ఉందా?'