విదేశీ సాధువు

భారతీయ సంస్కృతి  ప్రపంచంలోకెల్లా గొప్పదని భావించే ఓ విదేశీయుడు ఇక్కడి ఆధ్యాత్మికతకు ముగ్ధుడైపోయాడు. వీలున్నప్పుడల్లా వచ్చి ఇక్కడి పుణ్యక్షేత్రాలను సందర్శిస్తాడు. శివతత్వానికి మించి, మహిమాన్వితమైనది మరొకటి లేదని చెబుతున్నాడు చెక్​ రిపబ్లిక్​ దేశానికి చెందిన మచ్చేంద్రనాథ్.​

వేదాలు వెలసిన ధరణి భారతదేశం. ఓంకార నాదం పలికిన అవని ఈ దేశం. ప్రపంచ దేశాలు కన్ను తెరవకముందే ఈ నేలలో విజ్ఞాన కిరణాలు ప్రసరించాయి. అందుకే భారతీయ సంస్కృతి సంప్రదాయాలకు ప్రపంచ దేశాలు జేజేలు కొడుతాయి. భారతావనికి వచ్చి ఇక్కడి ఆధ్యాత్మికతకు పరవశం చెందిన విదేశీయులెందరో. అందులో ఐరోపాకు చెందిన మచ్చేంద్రనాథ్​ ఒకరు.

భారతదేశమన్నా, ఇక్కడి సంస్కృతి అన్నా ఎంతో ఇష్టపడే మచ్చేంద్ర ఈ సారి ఉత్తరప్రదేశ్​లోని కుంభమేళాకు వచ్చారు. అక్కడి నుంచి దక్షిణభారతంలోని ప్రముఖ పుణ్యక్షేత్రాలను సందర్శిస్తున్నారు. ఈ క్రమంలోనే ఓరుగల్లులోని వేయిస్తంభాల ఆలయాన్ని సందర్శించారు.

కంప్యూటర్లు లేని కాలంలోనే గొప్ప గొప్ప కట్టడాలను నిర్మించిన ఘనత భారతదేశానిదని కీర్తించారు. మహాశివరాత్రి దాకా ఇక్కడే ఉండి శ్రీశైల మల్లిఖార్జున్ని దర్శిస్తానని తెలిపారు. భారతదేశానికి ఎన్నిసార్లు వచ్చినా తనివితీరదన్నారు.