కేబినెట్ భేటీలో ఆ విషయంపై చర్చించాలంటూ.. సీఎం కేసీఆర్​కు బండి సంజయ్ లేఖ

Bandi Sanjay wrote a letter to CM KCR: తక్షణమే వేతన సవరణ సంఘాన్ని ఏర్పాటు చేయాలని డిమాండ్ చేస్తూ బీజేపీ రాష్ట్ర అధ్యక్షుడు బండి సంజయ్ సీఎం కేసీఆర్​కు లేఖ రాశారు. ఈ నెల 9న జరిగే కేబినెట్ భేటీలో పీఆర్సీపై చర్చించాలని లేఖలో పేర్కొన్నారు. అలాగే ఆత్మహత్యాయత్నానికి పాల్పడి మరణించిన మెడికో ప్రీతి కుటుంబాన్ని ఆయన పరామర్శించారు. రాష్ట్రంలో పేదలకు ఎన్ని డబుల్ బెడ్​రూం ఇళ్లు కట్టించి.. ఎంత మందికి పంపిణీ చేశారనే దానిపై సీఎం శ్వేతపత్రం విడుదల చేయాలన్నారు.

Bandi Sanjay wrote a letter to CM KCR: తక్షణమే వేతన సవరణ సంఘాన్ని ఏర్పాటు చేసి జులై ఒకటో తేదీ నుంచి ఉద్యోగులకు పెరిగిన జీతాలు చెల్లించాలని బీజేపీ రాష్ట్ర అధ్యక్షుడు బండి సంజయ్ డిమాండ్ చేశారు. ఈ నెల 9న జరగబోయే కేబినెట్ సమావేశంలో పీఆర్సీ ఏర్పాటుతో పాటు మూడు నెలల్లో నివేదిక తెప్పించుకుని జులై ఒకటి నుంచి కొత్త పీఆర్సీ అమలయ్యేలా చర్యలు తీసుకోవాలని సీఎం కేసీఆర్‌కు రాసిన లేఖలో పేర్కొన్నారు. కేబినెట్ సమావేశంలో ప్రజలకిచ్చిన హామీలన్నింటిపై చర్చించి తక్షణమే అమలయ్యేలా నిర్ధిష్ట కార్యాచరణ రూపొందించాలని తెలిపారు. లేనిపక్షంలో ఆయా హామీల అమలు కోసం బీజేపీ పక్షాన ప్రజలతో కలిసి భారీ ఎత్తున ఉద్యమాలు చేస్తామన్నారు. జరుగబోయే పరిణామాలకు రాష్ట్ర ప్రభుత్వమే బాధ్యత వహించాల్సి ఉంటుందని హెచ్చరించారు.

ప్రీతి కేసును వదిలిపెట్టే ప్రసక్తే లేదు : ఇటీవల వరంగల్​ ఎంజీఎంలో ఆత్మహత్యాయత్నానికి పాల్పడి మృతి చెందిన మెడికో విద్యార్థి డాక్టర్ ప్రీతి కుటుంబాన్ని బండి సంజయ్‌ పరామర్శించారు. జనగామ జిల్లా కొడకండ్ల మండలం మొండ్రాయి గిర్ని తండాలోని యువతి నివాసానికి వెళ్లిన బండి సంజయ్‌... ప్రీతి చిత్ర పటానికి పూలమాల వేసి నివాళులర్పించారు. ప్రీతిది ఆత్మహత్య కాదు... హత్యేనని బండి సంజయ్ ఎదుట ప్రీతి కుటుంబ సభ్యులు ఆవేదన వ్యక్తం చేశారు. ఈ వ్యవహారంపై సిట్టింగ్ జడ్జితోనే విచారణ జరిపించేలా ప్రభుత్వంపై ఒత్తిడి తేవాలని కోరారు. ప్రీతి కేసును వదిలిపెట్టే ప్రసక్తే లేదన్న బండి... న్యాయం జరిగే వరకు బీజేపీ పోరాడుతుందని హామీ ఇచ్చారు. ఇప్పటికే ప్రీతి ఘటనను ఎస్టీ కమిషన్​కు ఫిర్యాదు చేశామని గుర్తుచేసిన సంజయ్... ఈ కేసును రాష్ట్ర ప్రభుత్వం పక్కదారి పట్టించే ప్రయత్నం చేస్తోందని ఆరోపించారు.

దానిపై సీఎం శ్వేతపత్రం విడుదల చేయాలి : సూర్యాపేట జిల్లా తిరుమలగిరి మండల కేంద్రంలో జరిగిన ఓ సమావేశంలో బీజేపీ రాష్ట్ర అధ్యక్షు బండి సంజయ్ పాల్గొని బీఆర్​ఎస్ పాలనపై విమర్శలు గుప్పించారు. ప్రధానమంత్రి ఆవాస్ యోజన పథకం కింద వచ్చిన పదిలక్షల కోట్ల నిధులు ఏం చేశారో చెప్పాలని రాష్ట్ర ప్రభుత్వాన్ని డిమాండ్ చేశారు. రాష్ట్రంలో పేదలకు ఎన్ని డబుల్ బెడ్​రూం ఇళ్లు కట్టించి.. ఎంత మందికి పంపిణీ చేశారనే దానిపై సీఎం శ్వేతపత్రం విడుదల చేయాలన్నారు. ధరణి పోర్టల్​తో రైతులు నానా ఇబ్బందులు పడుతున్నారని ఆరోపించారు.

రాష్ట్రంలో శాంతి భద్రతలు క్షీణించాయన్న బండి సంజయ్.. మహిళలు, విద్యార్థులకు రక్షణ కరవైందని వ్యాఖ్యానించారు. రైతులకు రుణమాఫీ చేస్తానని చెప్పి ఇప్పటివరకు చేయకపోవడంతో బ్యాంకుల్లో తీసుకున్న అప్పుకు అధిక వడ్డీలు పడుతున్నాయని ఆవేదన వ్యక్తం చేశారు. లిక్కర్ ద్వారానే రాష్ట్రంలో 40వేల కోట్ల ఆదాయం వస్తుందన్నారు. రాష్ట్రంలో 9 సార్లు కరెంట్ ఛార్జీలు, 7 సార్లు బస్​ ఛార్జీలు పెంచిన ప్రజలపై మోయలేని భారం మోపారని మండిపడ్డారు. తుంగతుర్తి ఐకేపీ కేంద్రాల్లో జరిగిన అవినీతిపై విచారణ జరిపి బాధ్యులను శిక్షించాలని బండి సంజయ్ డిమాండ్ చేశారు.

ఇవీ చదవండి: