కలెక్టర్​ కార్యాలయాన్ని ముట్టడించిన రేషన్​ డీలర్లు

వనపర్తి జిల్లా కలెక్టర్​ కార్యాలయం ముందు రేషన్​ డీలర్లు ధర్నా చేపట్టారు. వెంటనే తమ సమస్యలను పరిష్కరించాలని డిమాండ్​ చేశారు. లేదంటే.. ఈనెల 31న రాష్ట్ర వ్యాప్త సమ్మె చేపడతామని హెచ్చరించారు.

వనపర్తి జిల్లా పరిధిలోని రేషన్​ డీలర్లు.. వెంటనే తమ సమస్యలను పరిష్కరించాలని డిమాండ్​ చేస్తూ.. సోమవారం జిల్లా కలెక్టర్​ కార్యాలయం ముందు ధర్నా చేపట్టారు. రేషన్​ దుకాణాల్లో వినియోగదారుల నుంచి వేలిముద్ర గుర్తింపు తీసుకోవడానికి ప్రభుత్వం సరఫరా చేసిన యంత్రాలకు సిగ్నల్ అందకపోవడంతో తీవ్ర ఇబ్బందులు ఎదుర్కొంటున్నామని తెలిపారు.

సిగ్నల్​ సమస్యలను పరిష్కరించాలని కోరుతూ.. పలుమార్లు పై అధికారుల దృష్టికి తీసుకువెళ్లినా… ఎలాంటి ఫలితం లేదని వాపోయారు. ప్రస్తుతం కరోనా వైరస్​ వేగవంతంగా వ్యాప్తి చెందుతున్న తరుణంలో వేలిముద్ర గుర్తింపులు వెంటనే కాకపోవడంతో రేషన్​ షాపుల ముందు వినియోగదారులు పడిగాపులు కాస్తున్నారు.

ఉదయం 6 గంటల నుంచి రేషన్ ​షాపులు తెరిచి ఉంచినప్పటికీ.. కొంతమంది వినియోగదారులకు మాత్రమే సరకులు అందుతున్నాయని పేర్కొన్నారు. రేషన్​ డీలర్లకు థర్డ్​ పార్టీ సౌకర్యం కల్పించాలని ప్రభుత్వం దృష్టికి తీసుకుపోయిన పట్టించుకోవడం లేదని వారు పేర్కొన్నారు. ప్రజలకు ప్రభుత్వాలకు వారధులుగా పనిచేసే రేషన్​డీలర్ల సమస్యలను వెంటనే పరిష్కరించాలని లేదంటే.. ఈనెల 31న రాష్ట్ర వ్యాప్త సమ్మె చేపడతామని హెచ్చరించారు.

ఇదీ చదవండి:రాగల రెండు రోజుల్లో తేలికపాటి వర్షాలు