కొనుగోలు కేంద్రాల్లో తరుగు పేరుతో దోపిడీ

ఆరుగాలం కష్టపడి పండించిన పంటను అమ్ముకునే వేళ కేంద్రాల నిర్వాహకులు అక్రమాలకు పాల్పడుతున్నారు. తాలు, సంచి తరుగు పేరుతో నిబంధనల కంటే ఎక్కువ తూకం వేస్తున్నారు. ఉమ్మడి పాలమూరులో ఒక్కో జిల్లాలో ఒక్కో విధంగా తరుగు తీసే విధానాన్ని అమలు చేస్తుండటం వల్ల రైతులు భారీగా నష్టపోతుండగా.. మిల్లుల యజమానులు మాత్రం లాభపడుతున్నారు. కొనుగోలు కేంద్రాల నిర్వాహకులు.. కొందరు అధికారులు.. వ్యాపారులు కలిసి అన్నదాత ఆదాయానికి గండి కొడుతున్నారు.

మహబూబ్‌నగర్‌ జిల్లాలో క్వింటాలుకు 5 నుంచి 7 కిలోల వరకు అధికంగా తూకం చేస్తున్నారు. దీనిపై కొందరు రైతులు జిల్లా ఉన్నతాధికారులకు ఫిర్యాదు చేయగా ప్రస్తుతం బస్తాకు 2 కిలోలు తరుగు తీస్తున్నారు. నాగర్‌కర్నూల్‌, నారాయణపేట, వనపర్తి జిల్లాలో బస్తాకు 1.8 కిలోలు, జోగులాంబ గద్వాల జిల్లాలో 700 గ్రామాల చొప్పున తరుగు తీస్తున్నారు.

అధికారులు చూసీచూడనట్లుగా

ధాన్యం కొనుగోలు కేంద్రాల్లో నిర్వహకులు బస్తాకు 1.5-3 కిలోల వరకు అధికంగా తూకం చేస్తున్నా అధికారులు పట్టించుకోవడం లేదు. తాలు, తేమ శాతం ఎక్కువగా ఉన్నందున కిలో నుంచి రెండు కిలోల వరకు ఎక్కువగా తీసుకుంటున్నట్లు కొందరు అధికారులే అంగీకరిస్తున్నారు. తూకం చేశాక లారీల్లో మిల్లర్ల దగ్గరకు తీసుకెళ్లేటప్పుడు ఆలస్యం కావడంతో తరుగు వస్తుందని అందుకే కొంత ఎక్కువ తూకం చేస్తున్నట్లు అధికారులు పేర్కొంటుండటం గమనార్హం.

ఈ విషయమై వనపర్తి, మహబూబ్‌నగర్‌ జిల్లాల పౌరసరఫరాలశాఖ అధికారులు రేవతి, వనజాత, నాగర్‌కర్నూల్‌, నారాయణపేట జిల్లాల మార్కెటింగ్‌ మేనేజర్లు బాలరాజు, హతీరాంలతో మాట్లాడగా నిర్ణయించిన తూకం కంటే ఎక్కువ తీసుకుంటే చర్యలు తీసుకుంటామని వారు స్పష్టం చేశారు. క్షేత్రస్థాయికి అధికారులు వెళ్లి పరిశీలించి తగు చర్యలు తీసుకుంటేనే రైతుకు న్యాయం జరుగుతుంది. అధికారులు ఆ వైపుగా దృష్టి సారించాల్సిన అవసరం ఉంది.

ఇలా సేకరించిన మొత్తాన్ని నిర్దేశించిన మిల్లులకు లారీల్లో పంపిస్తారు. ఒక లారీలో 650 నుంచి 680 బస్తాల వరకు మిల్లులకు చేరవేస్తున్నారు. అంటే ఒక బస్తా వెనక 2.700 కిలోల ధాన్యం అదనంగా మిల్లులకు వెళ్తుంది. 680 బస్తాల వద్ద 1,836 కిలోలను మిల్లర్లు ఎక్కువగా తీసుకుంటున్నారు.

* కొనుగోలు కేంద్రాల్లో 100 కిలోలను రైతుల నుంచి కొనుగోలు చేయాలంటే 40 కిలోల విలువ ఉన్నవి రెండు బస్తాలు, 20 కిలోలు ఉన్న ఒక బస్తాను తూకం చేయాలి. ఇలా చేసే సమయంలో ఒక బస్తా దగ్గర 2 కిలోల 700 గ్రాములు అదనంగా తీసుకుంటున్నారు. అంటే మూడు బస్తాలకు కలిపి ఏడు కిలోల వంద గ్రాములను కొనుగోలు కేంద్రాల నిర్వాహకులు రైతుల నుంచి తీసుకుంటున్నారు.

* రైతుల దగ్గర 40 కిలోల వరి బస్తాను తూకం చేసేందుకు కొనుగోలు కేంద్రాల నిర్వాహకులు 700 గ్రాముల వరి ధాన్యం తరుగుగా తీయాలి. ఈ తరుగు ఖాళీ సంచి బరువు మాత్రమే. ఖాళీ సంచీ 700 గ్రాములు ఉంటుంది. కావున అంతే మొత్తం తరుగును రైతు నుంచి తీసుకోవాలి.

* కొనుగోలు కేంద్రాల్లో అదనపు తరుగు లెక్కలు రాయటం లేదు. వీటి పర్యవేక్షణను స్థానిక ఏవోలకు, ఏపీఎంలకు అప్పగించారు. వారు నిత్యం కొనుగోలు కేంద్రాల నుంచి మిల్లర్లకు లారీలను పంపించాలి. కాని కొందరు మిల్లర్లు నాణ్యత లేవని వెనక్కి పంపించడం.. అధికారులు వెళ్లి వారికి నాణ్యత బాగానే ఉంది. తరుగు పేర ఎక్కువగానే ఇస్తున్నామని చెబుతుండటం అనుమానాలకు తావిస్తోంది. ఒక లారీ వెనక దాదాపు రూ.36 వేలకు పైగా మిల్లర్లకు మిగులుతున్నాయనేది రైతుల ఆరోపణ. ఈ మొత్తంలో కొందరు అధికారులు కూడా భాగస్వాములైనట్లు రైతులు ఆరోపిస్తున్నారు.

తాజా ఉదాహరణలు ఇవీ..

* నాగర్‌కర్నూల్‌ జిల్లా తాడూరు మండల కేంద్రానికి చెందిన శేఖర్‌ 20 క్వింటాళ్ల ధాన్యాన్ని కొనుగోలు కేంద్రంలో విక్రయించాడు. కేంద్రం నిర్వాహకులు అధికంగా తూకం వేయడంతో దాదాపు 50 కిలోలకు పైగా నష్టపోయినట్లు తెలిపాడు.

* నారాయణపేట జిల్లా పేరపల్లికి చెందిన బసిరెడ్డి 42 క్వింటాళ్లు విక్రయించాడు. బస్తాకు 1.5 కిలోల చొప్పున ఎక్కువగా తూకం చేయడంతో 50 కిలోలకు పైగా నష్టపోయినట్లు వివరించాడు.

* నాగర్‌కర్నూల్‌ జిల్లా బిజినేపల్లి మండల కేంద్రంలో వరి కొనుగోలు కేంద్రాన్ని నవంబరు 11న ప్రారంభించారు. ఇప్పటి వరకు అక్కడ ధాన్యం కొనుగోలు చేయడం లేదు. కారణం ఈ కొనుగోలు కేంద్రం నిర్వాహకులు వ్యాపారులతో కుమ్మక్కై వారు కొనుగోలు చేసిన ధాన్యాన్నే తాము కొనుగోలు చేసినట్లు చూపిస్తూ కమీషన్‌ నొక్కేస్తున్నట్లు ఆరోపణలు ఉన్నాయి.

బిజినేపల్లిలో కొనుగోలు కేంద్రాన్ని ప్రారంభించినప్పటికీ నిర్వాహకులు ధాన్యం కొనుగోలు చేయడం లేదు. ధాన్యం విక్రయించేందుకు కేంద్రం లేకపోవడంతో ప్రైవేటు వ్యాపారులను ఆశ్రయించా. 30 క్వింటాళ్ల ధాన్యాన్ని క్వింటాలుకు రూ.1,720 చొప్పున విక్రయించా. దీంతో పెద్దఎత్తున నష్టపోయా. ప్రారంభించిన కేంద్రాన్ని కొనసాగిస్తే నాలాంటి రైతులకు ఎంతగానో ఉపయోగపడుతోంది.

- సుదర్శన్‌రెడ్డి, పాలెం

ఇవీచూడండి:ధర్మాధికారి కమిటీ ముగింపు నివేదిక కొట్టివేయండి: తెలంగాణ