ఉమ్మడి పాలమూరుపై కరోనా పంజా.. ఒక్కరోజే 47 కేసులు

ఉమ్మడి పాలమూరు ​జిల్లాలో కరోనా ఉద్ధృతి కొనసాగుతోంది. ఆదివారం ఒక్కరోజే అత్యధికంగా 47 కొత్త కేసులు నమోదయ్యాయి. ముగ్గురు చనిపోయారు. ఫలితంగా అధికారులు, స్థానికుల్లో ఆందోళన మరింత పెరిగింది.

ఉమ్మడి మహబూబ్​నగర్ ​జిల్లాలో కరోనా పాజిటివ్‌ కేసుల సంఖ్య రోజురోజుకూ పెరుగుతోంది. తాజాగా ఆదివారం మరో 47 కొవిడ్‌-19 కేసులు నమోదయ్యాయి. ఫలితంగా ఉమ్మడి జిల్లా వ్యాప్తంగా మొత్తం కేసుల సంఖ్య 451కి చేరింది. అత్యధికంగా వనపర్తి జిల్లాలో 14 కేసులు నమోదు కాగా.. నాగర్‌కర్నూల్‌ జిల్లాలో 13, మహబూబ్‌నగర్‌ జిల్లాలో 9, గద్వాల జిల్లాలో 7, నారాయణపేట జిల్లాలో 2 కేసులు నమోదయ్యాయి. మహబూబ్‌నగర్‌ జిల్లాలో ఇద్దరు, నారాయణపేట జిల్లాలో ఒకరు మృత్యువాతపడ్డారు.

వనపర్తిలో..

వనపర్తి జిల్లాలో 14 కరోనా పాజిటివ్‌ కేసులు నమోదు కాగా.. పట్టణంలోని బ్రాహ్మణవీధికి చెందిన ఒకే ఇంట్లో నలుగురికి వైరస్​ సోకింది. పీర్లగుట్ట, బండారునగర్‌, కేడీఆర్‌ నగర్‌, టీచర్స్‌ కాలనీల్లో ఒక్కొక్కరు ఈ వైరస్​ బారినపడ్డారు. కొత్తకోటలో మరో 6 కేసులు నిర్ధారణయ్యాయి.

నాగర్​కర్నూల్​లో..

నాగర్​కర్నూల్​ జిల్లాలో 13 కరోనా పాజిటివ్‌ కేసులు నిర్ధారణ అయ్యాయని వైద్యాధికారులు వెల్లడించారు. అచ్చంపేట పట్టణంలో 8 మంది కరోనా బారినపడగా.. కన్యకా పరమేశ్వరి దేవస్థానం సమీపంలో ఓ ప్రైవేట్​ ఉద్యోగితో పాటు పాత బస్టాండ్ సమీపంలో నివసించే ఒక డ్రైవర్​, కిరాణా దుకాణ యజమాని వైరస్​ బారినపడ్డారు.

గతంలో కరోనా సోకిన ఓ కిరాణా దుకాణ యజమానికి సంబంధించిన ఇద్దరు ప్రైమరీ కాంటాక్టులకు కరోనా సోకగా.. బల్మూర్, లింగాల పోలీస్​స్టేషన్‌లలో పనిచేసే ఓ కానిస్టేబుల్‌, ఓ హోంగార్డులకు వైరస్​ సోకింది. తిమ్మాజీపేట మండలం పోతిరెడ్డిపల్లి గ్రామానికి చెందిన ఆర్టీసీ డ్రైవర్​కు కరోనా పాజిటివ్ నిర్ధారణ అయింది. అమ్రాబాద్ మండలం బీకే ఉప్పునుంతల గ్రామానికి చెందిన కానిస్టేబుల్​కు, చారకొండలో ఓ మేస్త్రీకి, నాగర్​కర్నూల్ పట్టణంలోని శ్రీనగర్ కాలనీలో ఒక విద్యార్థితో పాటు పట్టణంలో మరో వ్యక్తికి కరోనా పాజిటివ్​గా నిర్ధరణ అయిందని నాగర్‌కర్నూల్‌ వైద్యాధికారి తెలిపారు.

మహబూబ్​నగర్​లో..

మహబూబ్​నగర్ ​జిల్లాలో 9 మంది కరోనా బారినపడగా.. ఒకరు మృతి చెందారు. కొత్త చెరువురోడ్డు, శ్రీరామ కాలనీ, అస్లాంఖాన్‌ వీధి, దోబివాడలో ఒక్కొక్కరు, షాషాబ్‌గుట్టలో ఇద్దరికి కరోనా పాజిటివ్‌గా నిర్ధారణయింది. బాలానగర్‌ మండల కేంద్రంలో ఇద్దరు, హన్వాడ మండల కేంద్రంలో ఒకరికి వైరస్​ సోకింది. జడ్చర్ల మండల కేంద్రానికి చెందిన ఇద్దరు ఈ మహమ్మారి బారినపడ్డారు.

నారాయణపేటలో..

నారాయణపేట జిల్లా కేంద్రంలో ఒకే కుటుంబంలో 12 మందికి ఇదివరకే కొవిడ్‌-19 నిర్ధారణయింది. అదే కుటుంబంలో మరొకరు వైరస్​ బారినపడగా.. ఒకరు మృతి చెందారు. నారాయణపేట మండల పరిధిలోని జాజాపూర్‌కు చెందిన మరొకరికి కరోనా పాజిటివ్​గా నిర్ధారణ అయింది.

జోగులాంబ గద్వాలలో..

జోగులాంబ గద్వాల జిల్లాలో ఏడుగురికి కరోనా పాజిటివ్​గా నిర్ధారణయింది. గద్వాల పట్టణంలోని రాఘవేంద్ర కాలనీకి చెందిన ఇద్దరు, దేవాలయం వీధికి చెందిన ముగ్గురు, పాత హౌసింగ్‌ బోర్డు కాలనీకి చెందిన మరొకరు ఈ వైరస్​ బారినపడ్డారు. అలంపూర్ పట్టణానికి చెందిన ఓ డ్రైవర్‌కు కరోనా పాజిటివ్​గా నిర్ధారణ అయినట్లు వైద్యాధికారులు తెలిపారు.