Medical College in Wanaparthy: వనపర్తి జిల్లా కేంద్రంలోని పెబ్బేరు రహదారి మర్రికుంటకాలనీలో 50 ఎకరాల సువిశాలమైన స్థలంలో ప్రభుత్వ వైద్య కళాశాలను నిర్మించారు. గత ఏడాది నవంబరు 15న ముఖ్యమంత్రి కేసీఆర్‌ వర్చువల్‌గా దీన్ని ప్రారంభించారు. కళాశాలలో ప్రవేశాల ప్రక్రియ పూర్తవడంతో తరగతుల నిర్వహణకు అన్ని ఏర్పాట్లు పూర్తిచేశారు. తరగతి గదులు, బోధనాసామగ్రి, మెడికోలకు వసతిగృహాలను సిద్ధం చేశారు.
రాష్ట్ర వ్యవసాయ శాఖ మంత్రి ఎస్‌.నిరంజన్‌రెడ్డి తరగతుల ప్రారంభోత్సవ కార్యక్రమానికి విచ్చేయనున్నట్లు కళాశాల నిర్వాహకులు చెప్పారు. ప్రభుత్వం కేటాయించిన 150 సీట్లను భర్తీ చేయడానికి కళాశాల నిర్వాహకులు విడతల వారీగా కౌన్సెలింగ్‌ నిర్వహించారు. ఉత్తర భారతదేశానికి చెందిన పలువురు విద్యార్థులు జాతీయస్థాయి కోటాలో భాగంగా ఇక్కడ ప్రవేశాలు పొందారు. రేపటి నుంచి వైద్య విద్యా బోధన ప్రారంభం కానుంది.
ఇదీ ఆవిర్భావ క్రమం.. : 2021 జూన్‌ 2న రాష్ట్ర ముఖ్యమంత్రి కేసీఆర్‌ వనపర్తి జిల్లాకు ప్రభుత్వ వైద్య కళాశాలను మంజూరు చేస్తున్నట్లు ప్రకటించారు. దీనిలో భాగంగా 2022 జనవరి 25న రాష్ట్ర వైద్య ఆరోగ్య శాఖ మంత్రి టి.హరీశ్‌రావు వనపర్తిని సందర్శించి కళాశాల ఏర్పాటు చేయనున్న స్థలాన్ని పరిశీలించారు. ఆగస్టు 11న జాతీయ వైద్య మండలి అధికార బృందం వనపర్తిని సందర్శించి స్థానికంగా చేస్తున్న ఏర్పాట్లను పరిశీలించింది. అక్టోబరు 23న ప్రారంభమైన ప్రవేశాలు డిసెంబరు 27వ తేదీతో ముగిశాయి. 2022-23 విద్యా సంవత్సరంలో కళాశాలకు మొత్తం 150 సీట్లు కేటాయించారు. ఇందులో అఖిలభారత కోటా కింద 22 సీట్లను రిజర్వు చేశారు. ఆయా సీట్లలో సుదూర ప్రాంతాలైన రాజస్థాన్‌, బిహార్‌, హరియాణ, దిల్లీ, ఉత్తరప్రదేశ్‌, మహారాష్ట్రలకు చెందిన అభ్యర్థులు చేరారు. జిల్లాకు చెందిన పది మందికి పైగా విద్యార్థులకు సీట్లు లభించినట్లు వైద్య కళాశాల అధికారులు వివరించారు.