వికారాబాద్ జిల్లాలో భారీ వర్షం.. ఉప్పొంగిన వాగులు

నాలుగు రోజులుగా వికారాబాద్ జిల్లాలో కురుస్తున్న వర్షాలకు... కాగ్నానది, కోకట్ వాగు వరద నీటితో నిండిపోయాయి. పలు చోట్ల రోడ్డు మార్గాలు తెగిపోయి... రాకపోకలు స్తంభించిపోయాయి. పంటలు నీట మునిగి చెరువులను తలపిస్తున్నాయి.

వికారాబాద్ జిల్లా తాండూరులో ఉదయం నుంచే భారీగా వర్షం కురుస్తోంది. నాలుగు రోజులుగా కురుస్తున్న వర్షాలకు.. కాగ్నానది, కోకట్ వాగు వరద నీటితో నిండి పొంగిపొర్లుతున్నాయి.

వర్షం కారణంగా థరూర్ మండలం, పెద్దేముల్ మండలం మన్సాన్​పల్లి రోడ్డు మార్గాలు తెగిపోయాయి. దీంతో హైదరాబాద్​కు వెళ్లే మార్గంలో రాకపోకలు స్తంభించిపోయాయి. తాండూర్ నుంచి కొడంగల్ మీదుగా హైదరాబాద్​కు రాకపోకలు కొనసాగిస్తున్నారు.

వర్షం ప్రభావంతో పంటలు నీట మునిగాయి. ఇప్పటికే పత్తి, కంది పంటలు పాడైపోయాయి. పొలాలన్నీ వర్షం నీటితో నిండిపోవడంతో... చెరువులను తలపిస్తున్నాయి.

ఇదీ చూడండి:జోరు తగ్గని వానలు.. వేల ఎకరాల్లో పంట నష్టం