అనంతగిరుల్లో ప్రశాంతంగా ముగిసిన పోలింగ్

రంగారెడ్డి జిల్లా చేవెళ్ల లోక్​సభ ఎన్నికలు ప్రశాంతంగా ముగిశాయి. ఏడు అసెంబ్లీ సెగ్మెంట్​లోని ఓటర్లలో సుమారు 54 శాతం మంది తమ తీర్పును ఈవీఎంలలో నిక్షిప్తం చేశారు. ఉదయం 7 గంటల నుంచి సాయంత్రం 5 గంటల వరకు పోలింగ్ జరిగింది. పట్టణ ప్రాంతాల కంటే పల్లె ప్రజలే ఎక్కువ శాతం ఓట్లు వేసేందుకు మొగ్గు చూపారు.

రంగారెడ్డి జిల్లా చేవెళ్ల లోక్​సభను ప్రతిష్ఠాత్మకంగా తీసుకున్న ప్రధాన పార్టీల అభ్యర్థుల భవితవ్యం ఈవీఎంల్లో నిక్షిప్తమైంది. ఈ లోక్​సభ పరిధిలోని 24 లక్షల మంది ఓటర్లలో కేవలం 53.8 శాతం మంది మాత్రమే తమ ఓటు హక్కును వినియోగించుకున్నారు. ఉదయం 6 గంటలకు మాక్​ పోలింగ్​తో ప్రారంభమైన ప్రక్రియ సాయంత్రం అయిదు గంటలకు ముగిసింది.

ఆసక్తి చూపని పట్టణవాసులు
మొత్తం ఏడు అసెంబ్లీ సెగ్మెంట్లలో పట్టణ ప్రాంతాల్లోని ఓటర్లు తక్కువ సంఖ్యలో పోలింగ్ కేంద్రాలకు వచ్చారు. శేరిలింగంపల్లి, మహేశ్వరం, రాజేంద్రనగర్ నియోజకవర్గాల పరిధిలో ఓటింగ్ తక్కువగా నమోదైంది. గ్రామీణ ప్రాంతాల్లో ఓటింగ్ ఆశించిన స్థాయిలో జరిగింది. అయితే 2014 లోక్​సభ ఎన్నికల్లో చేవెళ్ల పార్లమెంట్​లో 60.51 శాతం పోలింగ్ నమోదు కాగా ఈసారి 10 శాతం ఓటింగ్ తగ్గడం గమనార్హం.

ఫలించిన అధికారుల రాయబారం
వికారాబాద్ మండల పరిధిలోని మద్గుల చిట్టంపల్లి గ్రామాన్ని మున్సిపాలిటీలో విలీనం చేయటంతో ఎన్నికలను బహిష్కరిస్తున్నట్లు ప్రకటించినప్పటికీ... ఉదయం అధికారులు నచ్చచెప్పటంతో ఓటింగ్ ప్రక్రియలో పాల్గొన్నారు.
మున్సిపల్ పరిధిలోని లక్ష్మీనగర్ తండాలో తీవ్ర నీటి ఎద్దడి ఉన్నందున ఎన్నికలను బహిష్కరించి ఖాళీ బిందెలతో నిరసన తెలిపారు. నాలుగు గంటల సమయంలో స్థానిక ఎమ్మెల్యే హామీ ఇవ్వటం వల్ల వారు ఓటింగ్​లో పాల్గొన్నారు.

వెల్లువెత్తిన మహిళా చైతన్యం
వికారాబాద్ మున్సిపల్ పరిధిలో అధికంగా మహిళా ఓటర్లు ఉన్న గంగారంలో సఖీ పోలింగ్ కేంద్రంను ఏర్పాటు చేశారు. కలెక్టర్ అయేషా ఆ సెంటర్​ను సందర్శించారు. మహిళ ఓటింగ్​ను పెంచడానికి ఈ కేంద్రాన్ని ఏర్పాటు చేశామన్నారు.

ఓటర్ల తీర్పు నిక్షిప్తమైన ఈవీఎంలను పోలింగ్ కేంద్రాల నుంచి ఎన్నికల సిబ్బంది శంషాబాద్​ సమీపంలోని పాలమాకులలో కౌంటింగ్ కేంద్రానికి తరలించారు.

ఇవీ చూడండి: ముగిసిన తెలంగాణ లోక్​సభ ఎన్నికల పోలింగ్