కరోనా అలర్ట్​: మునగాలలో స్వచ్ఛంద లాక్​డౌన్​

కరోనా కేసుల తీవ్రత దృష్ట్యా సూర్యాపేట జిల్లా మునగాల గ్రామ పంచాయతీ స్వచ్ఛంద లాక్​డౌన్​ ప్రకటించింది. మధ్యాహ్నం ఒంటిగంట నుంచి సాయంత్రం ఆరు గంటల వరకు లాక్​డౌన్​ విధించినట్లు పాలకవర్గం తీర్మానించింది.

సూర్యాపేట జిల్లా మునగాల మండల కేంద్రంలో మధ్యాహ్నం ఒంటి గంట నుంచి ఆరు గంటల వరకు లాక్​డౌన్​ విధిస్తూ పంచాయతీ పాలకవర్గం తీర్మానించింది. కరోనా కేసులు తీవ్రస్థాయిలో నమోదవుతుండటంతో ఈ నిర్ణయం తీసుకున్నట్లు సర్పంచ్ చింతకాయల ఉపేందర్ తెలిపారు.

లాక్​డౌన్​కు పూర్తి మద్దతునిస్తూ గ్రామంలోని దుకాణాలను స్వచ్చందంగా మూసేశారు. ఒంటి గంట తర్వాత వీధులన్నీ నిర్మానుష్యంగా మారాయి. ప్రతి ఒక్కరూ మాస్కులు ధరించి బయటకు రావాలని సర్పంచ్​ సూచించారు. లాక్​డౌన్​ సమయాల్లో బయటకు రాకుండా ఇంట్లోనే ఉంటూ తగిన జాగ్రత్తలు తీసుకోవాలని అన్నారు. జిల్లాలోనే లాక్​డౌన్ విధించిన మొదటి గ్రామంగా మునగాల నిలిచిందని చెప్పారు.

ఇదీ చదవండి:రియల్‌ ఎస్టేట్​లో ఒడుదుడుకులున్నా... ప్రస్తుతం ఆశాజనకమే..!