రాష్ట్రవ్యాప్తంగా పల్లెల్లో ప్రభుత్వం ప్రకృతివనాలను ఏర్పాటుచేస్తోంది. నిబంధనల ప్రకారం ప్రకృతి వనానికి కావాల్సింది... అయిదు గుంటల స్థలం. కానీ సూర్యాపేట జిల్లా చివ్వెంల అధికారులకు మాత్రం... ప్రకృతి వనానికి మూడెకరాల వరకు భూమి సేకరించారు. మూడు పంచాయతీలు, మరో మూడు అనుబంధ పల్లెలకు సంబంధించి వీకేపహాడ్‌లోని భూమి తీసుకున్నారు. ఈ భూమిని... వీకే పహాడ్‌కు చెందిన 40 కుటుంబాలు సాగు చేసుకుంటున్నాయి. ఆ స్థలాన్ని అధికారులు స్వాధీనం చేసుకోవడంతో... సాగుదారులు ఆవేదన వ్యక్తం చేస్తున్నారు.
ఆనవాయితీగా వస్తోంది..
దూదేకుల వంశానికి చెందిన కుటుంబాల వారే... అనాదిగా శిఖం భూమిని సాగు చేస్తున్నారు. సదరు భూముల్లోకి వెళ్లేందుకు బాట లేకున్నా... ఇంటికి 15 వేలు వేసుకుని 6 లక్షల రూపాయలతో మట్టి కట్ట నిర్మించుకున్నారు. వీకే పహాడ్‌లో సదరు వంశానికి సంబంధించి 40 కుటుంబాలున్నా... వారి పెద్దల లెక్క ప్రకారం అయిదు కుటుంబాలుగానే పరిగణిస్తున్నారు. ప్రస్తుతం అధికారులు స్వాధీనం చేసుకున్న భూమిని ఆ సామాజిక వర్గీయులు... అంతర్గతంగా దేవుడి మాన్యం పేరిటే భావిస్తూ... ఏడాదికొకరు సాగు చేసుకుంటున్నారు. అందులో పంట వేసినవారే... ఆ సంవత్సరం పీర్ల పండుగ చేయడం ఆనవాయితీగా వస్తోంది.