ప్రభుత్వ సాయం పట్ల సంతోష్​బాబు కుటుంబ సభ్యుల హర్షం

గల్వాన్​ లోయలో చైనా సైనికులతో జరిగిన ఘర్షణలో మరణించిన కర్నల్​ సంతోష్​బాబు కుటుంబానికి ప్రభుత్వం ఆర్థిక సాయం ప్రకటించడం పట్ల కుటుంబ సభ్యులు హర్షం వ్యక్తం చేశారు. ఈ సందర్భంగా ముఖ్యమంత్రి కేసీఆర్​, మంత్రి జగదీశ్​రెడ్డికి కృతజ్ఞతలు తెలిపారు.

గల్వాన్​ ఘటనలో ప్రాణాలొదిలిన అమర జవాన్​లకు రాష్ట్ర ప్రభుత్వం భారీ విరాళం ప్రకటించడం పట్ల కర్నల్ సంతోష్​బాబు కుటుంబం హర్షం వ్యక్తం చేశారు. ఈ సందర్భంగా ముఖ్యమంత్రి కేసీఆర్, జిల్లా మంత్రి జగదీశ్​రెడ్డికి కృతజ్ఞతలు తెలిపారు. ఇంత తక్కువ సమయంలో రూ.5 కోట్ల రూపాయలు, ప్రభుత్వ ఉద్యోగం ప్రకటించడం పట్ల సంతోషం వ్యక్తం చేశారు.

రాష్ట్ర ప్రభుత్వం అందించిన ఆర్థిక సహకారం తమకు కొంత ఉపశమనాన్ని ఇవ్వనుందని సంతోష్​బాబు తండ్రి బిక్కుమల్ల ఉపేందర్ ఆశాభావం వ్యక్తం చేశారు. ఇతర రాష్ట్రాలకు చెందిన అమర జవాన్​ల కుటుంబాలకూ ఆర్థిక సాయం అందిస్తున్నట్లు ప్రకటించడం ముఖ్యమంత్రికి ఉన్న దేశభక్తిని చాటుతోందని సంతోష్​బాబు తల్లి మంజుల, భార్య సంతోషి అన్నారు. ప్రభుత్వం ఇంత తక్కువ సమయంలో జవాన్​ల కుటుంబాలకు ఆర్థిక సాయం అందిస్తుందని తాము ఊహించలేదంటూ హర్షం వ్యక్తం చేశారు.

ఇదీ చూడండి :కర్నల్‌ సంతోష్‌బాబు కుటుంబానికి రూ.5 కోట్లు ప్రకటించిన సీఎం