CM KCR Districts tour : ఈ నెల 19, 20 తేదీల్లో మెదక్​, సూర్యాపేట జిల్లాల్లో సీఎం కేసీఆర్ పర్యటన

CM KCR Districts tour : ముఖ్యమంత్రి కేసీఆర్​ ఈ నెల 19, 20 తేదీల్లో వివిధ అధికారిక కార్యక్రమాల్లో బిజీబిజీగా గడపనున్నారు. ముందుగా మెదక్​ జిల్లాలో పర్యటించనున్న సీఎం.. నూతనంగా నిర్మించిన కలెక్టర్​ కార్యాలయం, జిల్లా పోలీస్ కార్యాలయాన్ని ప్రారంభించనున్నారు. 20న సూర్యాపేట జిల్లాలో మెడికల్​ కాలేజీని ప్రారంభించనున్నారు. పర్యటనలో భాగంగా పార్టీ కార్యక్రమాలు సైతం ఉంటాయని బీఆర్​ఎస్​ నేతలు తెలిపారు.

CM KCR Districts tour:సీఎం కేసీఆర్​ ఈ నెల 19, 20 తేదీల్లో మెదక్​, సూర్యాపేట జిల్లాల్లో పర్యటించనున్నట్లు ముఖ్యమంత్రి కార్యాలయం ప్రకటించింది. అందుకు సంబంధించిన షెడ్యూల్​ను వెల్లడించింది. ముందుగా ఈ నెల 19న మెదక్​ జిల్లాలో పర్యటించనున్న కేసీఆర్​.. నూతనంగా నిర్మించిన కలెక్టర్​ కార్యాలయాన్ని (Medak Collectorate Office Inauguration) ప్రారంభించనున్నారు. అలాగే జిల్లా పోలీసు కార్యాలయాన్ని సైతం ఆయన ప్రారంభించనున్నారు. అనంతరం బీఆర్​ఎస్​ ఏర్పాటు చేసిన బహిరంగ సభలో సీఎం పాల్గొంటారు.

Suryapet Collectorate Office Inaugurate : 20వ తేదీన సూర్యాపేటలో పర్యటించనున్న సీఎం.. అక్కడ కలెక్టర్​ కార్యాలయంతో పాటు జిల్లా పోలీసు కార్యాలయం ప్రారంభించనున్నారు. అలాగే ఇటీవలే నిర్మాణం పూర్తి చేసుకున్న సూర్యాపేట ప్రభుత్వ మెడికల్ కాలేజీని ప్రారంభించనున్నారు. నూతనంగా నిర్మించిన బీఆర్​ఎస్​ పార్టీ కార్యాలయాన్ని కేసీఆర్ ప్రారంభిస్తారు. అనంతరం పార్టీ ఏర్పాటు చేసిన బహిరంగ సభలో పాల్గొననున్నారు.

BRS on Telangana Assembly Elections :అసెంబ్లీ ఎన్నికలకు మరో రెండు నెలలే సమయం ఉండటంతో తాజా పర్యటన బీఆర్​ఎస్​కు మంచి అవకాశంగా కనిపిస్తోంది. పర్యటనలో భాగంగా ఉమ్మడి మెదక్​, నల్గొండ నేతలతో సీఎం కేసీఆర్ ​ భేటీ అవుతారని సమాచారం. స్థానికంగా నెలకొన్న సమస్యలు, పార్టీ నేతల మధ్య నడుస్తోన్న వర్గపోరు ఇలా అనేక అంశాలను స్థానిక నేతలతో కలిసి చర్చిస్తారు. ఇప్పటికే ఎన్నికలకు సంబంధించి ఎమ్మెల్యే అభ్యర్థుల తొలి జాబితా తయారు చేసే పనిలో నిమగ్నమైన బీఆర్​ఎస్​.. తాజా పర్యటనలో స్థానిక కార్యకర్తలతో కలిసి అభ్యర్థుల ఎంపిక ప్రక్రియపై చర్చలు జరపనున్నట్లు సమాచారం.

మరోవైపు.. పర్యటనల్లో భాగంగా సీఎం కేసీఆర్​ స్పీచ్​పై సర్వత్రా ఆసక్తి నెలకొంది. వరద నష్టంపై ప్రభుత్వం తీసుకున్న చర్యలు, పరిహారం వివరాలు మీటింగ్​లో ప్రస్తావించే అవకాశం ఉంది. అలాగే ఆర్టీసీ కార్మికులను ప్రభుత్వ ఉద్యోగులుగా గుర్తించడం, వీఆర్​ఏ క్రమబద్ధీకరణ అనేక అంశాలు బహిరంగ సభలో ప్రస్తావనకు వచ్చే అవకాశం ఉంది. అలాగే ఇటీవల కేబినెట్​ మీటింగ్​లో మంత్రి వర్గం తీసుకున్న నిర్ణయాలను ప్రజల ముందు వివరించనున్నారు. సంక్షేమ పథకాలకు ఎంత మొత్తంలో ప్రభుత్వం నిధులు మంజూరు చేసింది, రైతు రుణమాఫీ,గృహలక్ష్మి నిధుల మంజూరు ఇలా అనేక అంశాలపై సీఎం కేసీఆర్​ మాట్లాడే అవకాశం ఉందని పార్టీ శ్రేణులు చెబుతున్నారు. మరోవైపు బహిరంగ సభకు పార్టీ నాయకులు భారీ ఏర్పాట్లు చేస్తున్నారు.