POLICE RESCUED: ఫిట్స్ వచ్చి బస్టాండ్లోనే కుప్పకూలిన వ్యక్తిని పోలీసులు రక్షించారు. సకాలంలో ఆస్పత్రి తరలించి అతని ప్రాణాలు నిలిపారు. పోలీసులు చూపించిన మానవత్వం పట్ల స్థానికులు హర్షం వ్యక్తం చేస్తున్నారు. ఈ సంఘటన సిద్దిపేట జిల్లా హుస్నాబాద్ బస్టాండ్లో జరిగింది.
స్వగ్రామానికి వెళ్తుండగా..
అక్కన్నపేట మండలం మబ్బుకుంట తండాకు చెందిన మాలోత్ చంద్రు తన కుటుంబంతో కలిసి హనుమకొండలో కూలి పని చేసుకుంటూ జీవనం సాగిస్తున్నాడు. సొంత గ్రామానికి వెళ్లేందుకు హుస్నాబాద్ బస్టాండ్లో ఉండగా చంద్రు భార్య మందులు తీసుకురావడానికి వెళ్లింది. అదే సమయంలో చంద్రు ఫిట్స్ వచ్చి పడిపోయాడు. ఈ విషయాన్ని వెంటనే ప్రయాణికులు పోలీసులకు తెలియజేశారు.
వెంటనే స్పందించిన పోలీసులు బాధితున్ని 108లో ఆస్పత్రికి తరలించారు. సమయానికి పోలీసులు స్పందించడంతో చంద్రుకు ప్రాణాపాయం తప్పింది. వ్యక్తి ప్రాణాలు కాపాడిన ఎస్సై శ్రీధర్, బ్లూ కోట్ సిబ్బంది మల్లారెడ్డి, శంకర్కు బాధిత వ్యక్తి కుటుంబ సభ్యులు ధన్యవాదాలు తెలిపారు.
ఇదీ చూడండి: