బస్వాపూర్ గ్రామంలో మొత్తం 1500 మంది నివసిస్తుండగా.. 450 వరకు కుటుంబాలు ఉన్నాయి. అందరూ శ్రమజీవులే. అత్యధికులు వ్యవసాయం మీద ఆధారపడ్డ వారే. గతేడాది కరోనా తొలి విడతలోనూ ఒక్కరే మహమ్మారి చిక్కారు. ఈ క్రమంలో రెండో దశ మొదలుకాగానే స్థానిక పాలకులు, అధికారులు కట్టుదిట్టమైన ఆంక్షలతో వైరస్‌ బారిన పడకుండా చేయడంలో సఫలీకృతులయ్యారు.
అందరూ కలిసి..
చుట్టుపక్కల గ్రామాల్లో కరోనా కేసులు మెల్లిమెల్లిగా పెరుగుతుండటంతో స్థానిక సర్పంచి ఆలేటి మమత, పాలకవర్గ సభ్యులు సమావేశం అయ్యారు. ఎలాంటి ఆంక్షలు విధించాలో చర్చించుకొని పలు తీర్మానాలు చేశారు. నిబంధనలు విధించుకున్నారు. వాటిని అమలు చేయాలని నిర్ణయించుకొని అడుగేశారు. సర్పంచి, పంచాయతీ కార్యదర్శి, ఆశా కార్యకర్త, ఏఎన్‌ఎంలు ఇంటింటికి తిరుగుతూ జాగ్రత్తలను వివరించారు. కరోనా లక్షణాలపై అవగాహన కల్పించారు. మాస్క్‌లు విధిగా ప్రతి ఒక్కరూ ధరించేలా చర్యలు చేపట్టారు.
పరీక్షలు చేయిస్తూ..
అనుమానం వచ్చిన వారిని ఆలేటి లక్ష్మారెడ్డి స్మారక అంబులెన్స్‌లో మండలంలోని తీగుల్‌ ఆస్పత్రికి తరలించి పరీక్షలు చేయించారు. ఈ విధానాన్ని ఇప్పటికీ కొనసాగిస్తున్నారు. ఎవరూ అనవసరంగా బయటకు రాకుండా కట్టుదిట్టం చేశారు. గుంపులుగా గుమిగూడకుండా చర్యలు తీసుకున్నారు. శుభకార్యాలను సైతం కొంతమందితోనే కాన్నిచ్చేశారు. స్థానిక రేషన్‌ దుకాణంలో దూరం పాటిస్తూ బియ్యం తీసుకునే విధానాన్ని అవలంబించారు. కరోనా మొదటి దశలో పొరుగు గ్రామం నుంచి ఇక్కడికి వచ్చిన ఒక మహిళకు మినహా ఇప్పటి వరకు గ్రామస్థులెవరికీ పాజిటివ్‌ రాలేదని కార్యదర్శి ప్రశాంత్‌ తెలిపారు. వీధుల్లో తరచూ రసాయనాన్ని పిచికారీ చేయిస్తుండటంతో పాటు పారిశుద్ధ్యం పట్ల దృష్టిసారించారు.