Minister Harish Rao about Mallanna Sagar Project: విపక్షాల కుట్రలను తిప్పికొట్టి ముఖ్యమంత్రి కేసీఆర్.. మల్లన్న సాగర్ ప్రాజెక్టును సాకారం చేశారని మంత్రి హరీశ్‌రావు ప్రశంసించారు. ప్రజల అవసరాలు తెలిసిన నాయకుడి కృషి వల్లే.. తక్కువ సమయంలో ఈ ప్రాజెక్టు నిర్మాణం జరిగిందని కొనియాడారు. మల్లన్నసాగర్ ప్రాజెక్టుతో సగం తెలంగాణకు సాగు, తాగునీరు అందుతుందని హరీశ్‌రావు వెల్లడించారు.
ముఖ్యమంత్రి కేసీఆర్ ప్రజల అవసరాలు తెలిసిన నాయకుడు: హరీశ్‌రావు ఎంతో ప్రత్యేకమైన రోజు
ఇవాళ ఎంతో ప్రత్యేకమైన రోజని.. మల్లన్న పుట్టినరోజుతో పాటు, మల్లన్న సాగర్ ప్రాజెక్టుకు వ్యతిరేకంగా విపక్షాల పిటిషన్లను సుప్రీంకోర్టు కొట్టేసిన రోజని మంత్రి హరీశ్ అన్నారు. ప్రతిపక్షాల కుట్రలను తిప్పికొట్టి కేసీఆర్ ప్రాజెక్టును పూర్తి చేశారని కొనియాడారు. సమైక్య పాలనలో వానాకాలం వచ్చినా ఈ ప్రాంతం ఎండాకాలం లాగానే ఉండేదని.. సీఎం కేసీఆర్ పాలనలో సాగు నీటి ప్రాజెక్టులతో ఇప్పుడు ఏ కాలం చూసినా తెలంగాణ వానాకాలం లాగానే ఉందని హర్షం వ్యక్తం చేశారు.
"ఇవాళ మల్లన్న పుట్టినరోజు.. 4 ఏళ్ల క్రితం సుప్రీంకోర్టు కేసులు కొట్టేసిన రోజు. విపక్షాల కుట్రలను తిప్పికొట్టి కేసీఆర్ మల్లన్నసాగర్‌ను పూర్తిచేశారు. ముఖ్యమంత్రి కేసీఆర్ ప్రజల అవసరాలు తెలిసిన నాయకుడు. తక్కువ సమయంలో ప్రాజెక్టు నిర్మాణం జరిగిందంటే కేసీఆర్ కృషి వల్లే. సమైక్య రాష్ట్రంలో ఈ ప్రాంతం వానాకాలం కూడా ఎండాకాలం లాగే ఉండేది. కానీ తెలంగాణ వచ్చాక సీఎం కేసీఆర్ సారథ్యంలో ఇప్పుడు ఏ కాలం చూసినా వానాకాలం లాగే ఉన్నది."-హరీశ్ రావు, రాష్ట్ర ఆర్థిక శాఖ మంత్రి
అద్భుత ఘట్టం
సిద్దిపేట జిల్లా మల్లన్న సాగర్లో అద్భుత దృశ్యం ఆవిష్కృతమైంది. కాళేశ్వరం ఎత్తిపోతల పథకంలో భాగంగా చేపట్టిన మల్లన్న సాగర్ రిజర్వాయర్ను సీఎం కేసీఆర్ ప్రారంభించారు. 50 టీఎంసీల సామర్థ్యంతో ఈ ప్రాజెక్టు నిర్మాణం జరిగింది. మల్లన్న సాగర్ ద్వారా 15.70 లక్షల ఎకరాలకు సాగు నీరు అందనుంది. హైదరాబాద్కు తాగునీటి కోసం 30 టీఎంసీలు సరఫరా చేసే అవకాశం ఉంది. ఈ కార్యక్రమంలో మంత్రి హరీశ్ రావు, ఎంపీ కొత్త ప్రభాకర్ రెడ్డి, ప్రజాప్రతినిధులు తదితరులు పాల్గొన్నారు.
ఇదీ చదవండి:కాళేశ్వరం ప్రాజెక్టులో అద్భుత ఘట్టం... మల్లన్నను తాకిన గోదారమ్మ..
