గూగుల్ రాంగ్​రూట్ నావిగేషన్ - ప్రాజెక్టులోకి దూసుకెళ్లిన వ్యాన్​

Google Maps Mislead Van Driver : ఇప్పుడున్న జనరేషన్​ ఎక్కడికి వెళ్లాలన్న గూగుల్​ మ్యాప్స్​పైనే ఆధారపడుతున్నారు. తెలియని చోటుకైన వెళ్లేందుకు గూగుల్​ మ్యాప్స్​ను విపరీతంగా వాడుతున్నారు. ఒకవేళ అడ్రెస్​ అడుగుదామని అనుకున్న వింతగా చూస్తారేమోనని అనుకుంటారు కొందరు. మరికొందరు తప్పదు అన్నట్లు గూగుల్​ మ్యాప్స్​నే నమ్ముకుంటున్నారు. కానీ కొన్నిసార్లు టెక్నాలజీయే బోల్తా కొడుతుంది. అందుకు నిదర్శనం సిద్దిపేట జిల్లా గౌరవెల్లి ప్రాజెక్టు దగ్గర జరిగిన ఘటన.

Google Maps Mislead Van Driver : ఓ గూడ్స్​వ్యాన్ గూగుల్​ మ్యాప్​ ఆధారంగా గమ్యస్థలానికి చేరుకోవాల్సి ఉండగా, ఏకంగా ఓ ప్రాజెక్టులోకి తీసుకెళ్లింది. ప్రాజెక్ట్ దగ్గర గూగుల్ మ్యాప్ తప్పుదారి చూపడంతో ఈ ప్రమాదం జరిగింది. గుడాటిపల్లి వద్ద నిర్మించిన గౌరవెల్లి ప్రాజెక్టులో(Gouravelli project) ఓ వ్యాన్ చిక్కుకోవడానికి కారణమైంది. ఆదివారం తెల్లవారుజామున జరిగిన ఈ ఘటన ఆలస్యంగా వెలుగులోకి వచ్చింది. పాల ప్యాకెట్ కవర్ లోడ్​తో హుస్నాబాద్ నుంచి హైదరాబాద్​కు వెళుతూ, డ్రైవర్​కు దారిపై సరైన అవగాహన లేకపోవడంతో స్మార్ట్ ఫోన్​లో గూగుల్ రూట్ మ్యాప్ ఆధారంగా వ్యాన్​ను నడిపారు.

Google Maps Gone Wrong at Siddipet : నందారం స్టేజి దాటిన తర్వాత సూటిగా రోడ్డు ఉందని గూగుల్ మ్యాప్​(Google Maps) చూపగా, చీకట్లో వ్యాన్​ను నడుపుతూ అలాగే వెళ్లారు. వానల వల్ల నిలిచిన నీరు అనుకుని ముందుకు వెళ్లగానే లోతు పెరిగింది. దీంతో వ్యాన్ క్యాబిన్​లోకి నీళ్లు చేరి వాహనం నిలిచిపోయింది. గమనించిన డ్రైవర్... వ్యానులో ఉన్న ముగ్గురు మెల్లగా దిగి నీటిలో ఈదుకుంటూ సమీపంలోని జలు బాయ్ తండాకు వెళ్లారు. జరిగినదంతా వ్యాన్​ డ్రైవర్​ గ్రామస్థులకు తెలపగా వారు అవాక్కయ్యారు.

గ్రామస్థులే వ్యాన్​కు తాళ్లు కట్టి జేసీబీ సహాయంతో వెనక్కి లాగడంతో అతి కష్టం మీద బయటకు వచ్చింది. నాలుగు నెలల క్రితం కూడా ఓ లారీని కూడా గూగుల్ రూట్ మ్యాప్ తప్పుదారి పట్టియడంతో ఇదే రీతిలో ప్రాజెక్ట్​లోకి దూసుకెళ్లింది. అప్పుడు కూడా డ్రైవర్ అప్రమత్తతో ప్రాణాపాయం తప్పగా, గ్రామస్థులు జేసీబీ సహాయంతో లారీని బయటికి తీశారు.

Google Maps Mislead at Gouravelli Water Project : వాస్తవానికి నందారం స్టేజ్ వద్ద రోడ్డు స్టాపర్లను ఏర్పాటు చేసి వాహనాలను అక్కడి నుంచి బైపాస్ రోడ్డు ద్వారా దారి మళ్లించారు. కానీ స్టాపర్లు(Road Stopper) రోడ్డు పక్కన పడిపోయాయి, వాటి గురించి ఎవరూ పట్టించుకోలేదు. దీంతో వ్యాన్ ఆ దారిలో వెళ్లి నీటి ప్రాజెక్టులోకి దూసుకుపోయింది. ఇప్పటికైనా నందారం నుంచి ఉన్న దారిని పూర్తిగా మూసివేయాలని గ్రామస్థులు, స్థానికులు కోరుతున్నారు. లేకుంటే మరిన్ని ప్రమాదాలు జరిగే అవకాశముందని వారు హెచ్చరిస్తున్నారు.