విద్యుత్​ స్తంభాలు విరిగినా.. పట్టించుకోరా!

అకాల వర్షాల కారణంగా బలమైన ఈదురుగాలులకు విద్యుత్​ స్తంభాలు విరిగి పదిరోజులు గడుస్తున్నా అధికారులు పట్టించుకోవడం లేదని రైతులు వాపోతున్నారు. పది రోజుల క్రితం సిద్ధిపేట జిల్లా హుస్నాబాద్​ మండల పరిధిలోని ఆరేపల్లిలో పొలాలకు విద్యుత్​ సరఫరా చేసే విద్యుత్​ స్తంభాలు నేలకూలినా అధికారులు పట్టించుకోవడం లేదు.

సిద్ధిపేట జిల్లా హుస్నాబాద్​ మండలంలోని ఆరేపల్లిలో పది రోజుల క్రితం వచ్చిన ఈదురు గాలులు, వర్షాలకు విద్యుత్​ స్తంభాలు విరిగి నేలకూలాయి. గ్రామానికి చెందిన చెన్నబోయిన రాజయ్య అనే రైతు వ్యవసాయ బావి వద్ద ఈదురు గాలులకు విద్యుత్​ స్తంభం ప్రమాదకరంగా విరిగిపడింది. రైతులు విద్యుత్​ అధికారులకు సమాచారం అందించినా వారు పట్టించుకోలేదు.

విద్యుత్​ సరఫరాకు అంతరాయం ఏర్పడుతుందని అధికారులకు మొర పెట్టుకున్నా.. స్పందించి మరమ్మతులు చేపట్టలేదు. విషయం తెలుసుకున్న సీపీఐ రాష్ట్ర కౌన్సిల్​ సభ్యులు, హుస్నాబాద్​ మండల వైస్​ ఎంపీపీ గడిపె మల్లేష్​ రైతు పొలం దగ్గరికి వెళ్లి పరిశీలించారు. రైతుల సమస్యల పట్ల అధికారులు అలసత్వం ప్రదర్శిస్తే.. ఊరుకునేది లేదని ఆగ్రహం వ్యక్తం చేశారు. విరిగిపోయిన విద్యుత్​ స్తంభాలు వెంటనే మరమ్మతులు చేసి.. విద్యుత్​ సరఫరా కల్పించాలని కోరారు.

ఇవీ చూడండి:'మీ అందరి సూచనలను పరిగణనలోకి తీసుకుంటాం'