తెరాసకు బుద్ధి చెప్పే సమయం వచ్చింది: ఉత్తమ్

సిద్దిపేట జిల్లా దుబ్బాక ఉప ఎన్నికల కాంగ్రెస్ అభ్యర్థి చెరుకు శ్రీనివాస్ రెడ్డి ఇవాళ నామపత్రాలు దాఖలు చేశారు. ఈ సందర్భంగా భారీ ర్యాలీ నిర్వహించారు. దుబ్బాక అభివృద్ధి కోసం కాంగ్రెస్ అభ్యర్థిని గెలిపించాలని విజ్ఞప్తి చేశారు. తెరాసను ఓడించి రాష్ట్రంలో చరిత్ర సృష్టించే అవకాశం ఇక్కడి ప్రజలకు ఉందని పీసీసీ అధ్యక్షుడు ఉత్తమ్ కుమార్ రెడ్డి అన్నారు.

తెలంగాణ, దుబ్బాకను మోసం చేసిన కేసీఆర్​కు​ బుద్ధి చెప్పే సమయం వచ్చిందని పీసీసీ అధ్యక్షుడు ఉత్తమ్ కుమార్ రెడ్డి అన్నారు. సిద్దిపేట జిల్లా దుబ్బాక ఉపఎన్నిక కాంగ్రెస్ అభ్యర్థి నామినేషన్​ దాఖలు హాజరైన ఉత్తమ్​... రైతులకు లక్ష రూపాయల రుణమాఫీ, నిరుద్యోగులకు రూ.3 వేల భృతి రావాలంటే తెరాసను ఓడించాలని పిలుపునిచ్చారు. కాళేశ్వరం, మిషన్ భగీరథ పేరుతో రాష్ట్రాన్ని దోచుకున్నారని విమర్శించారు. ఎవరు డబ్బులు ఇచ్చినా తీసుకొని... చెరుకు శ్రీనివాస్ రెడ్డిని గెలిపించాలని కోరారు.

దుబ్బాక తీర్పు నాలుగు కోట్ల ప్రజల మార్పు కావాలని పీసీసీ కార్యనిర్వాహక అధ్యక్షుడు రేవంత్ రెడ్డి అన్నారు. దుబ్బాక మీద, రామలింగారెడ్డి మీద ప్రేమ ఉంటే... మంత్రి పదవి ఎందుకు ఇవ్వలేదని కేసీఆర్​ను ప్రశ్నించారు. మోదీ, కేసీఆర్​ ఒకటేనని... ఆణిముత్యం లాంటి ముత్యంరెడ్డి కొడుకు శ్రీనివాస్ రెడ్డిని గెలిపించాలని కోరారు. ఇక్కడి ప్రజలకు ఏ సమస్య వచ్చినా అండగా ఉంటామన్నారు.

దొంగ హామీలు ఇచ్చి కేసీఆర్​ అధికారంలోకి వచ్చారని భువనగిరి ఎంపీ కోమటిరెడ్డి వెంకట్​రెడ్డి విమర్శించారు. ప్రాజెక్టుల పేరుతో లక్షల కోట్లు దోచుకున్నారని ఎద్దేవా చేశారు. ఉద్యోగాలు భర్తీ చేయకుండా నిరుద్యోగులను కేసీఆర్ మోసం చేస్తున్నారని ఆరోపించారు. చింతమడకలో ఒక్కొక్కరికి రూ.10 లక్షలు ఇస్తున్నారు. దుబ్బాకలో పేదలు లేరా అని ప్రశ్నించారు. రాష్ట్రంలో భాజపాకు మనుగడ లేదని, కాంగ్రెస్ అభ్యర్థిని గెలిపించాలని విజ్ఞప్తి చేశారు. ర్యాలీలో ఎమ్మెల్సీ జీవన్ రెడ్డి, సీనియర్ నాయకులు షబ్బీర్ అలీ, హనుమంతరావు, కొండ విశ్వేశ్వర్ రెడ్డి, పొన్నాల లక్ష్మయ్య, పొన్నం ప్రభాకర్​, సంపత్ కుమార్ తదితరులు పాల్గొన్నారు.

ఇదీ చూడండి:దుబ్బాకలో కాంగ్రెస్​ జెండా ఎగురవేస్తాం: ఉత్తమ్​