అయ్యప్ప శరణు ఘోషతో మారుమ్రోగిన గజ్వేల్

మాల ధారణం నియమాల తోరణం అంటూ అయ్యప్ప శరణుఘోష నడుమ మండల మహా పడిపూజ కార్యక్రమం సిద్దిపేట జిల్లా గజ్వేల్​లో అత్యంత వైభవంగా జరిగింది. మండల మహాపడిపూజతో అయ్యప్ప స్వామి దేవాలయం శరణు ఘోషతో మారుమ్రోగింది.

సిద్దిపేట జిల్లా గజ్వేల్ పట్టణంలోని హరిహరపుత్ర అయ్యప్ప స్వామి దేవాలయంలో మండల మహా పడిపూజ కార్యక్రమాన్ని కన్నుల పండువగా నిర్వహించారు. ఉత్సవ విగ్రహాలకు వేదపండితుల మంత్రోచ్ఛారణలు, భక్తుల జయజయ ధ్వానాల మధ్య విశేష అభిషేకాలు నిర్వహించారు. అయ్యప్ప స్వామి ఆభరణాలను దీక్ష స్వాములు ఊరేగింపుగా తీసుకొచ్చారు.

దీక్ష స్వాములు చేసిన భజన ఆద్యంతం ఆధ్యాత్మికతను ప్రతిబింబించింది. వేలాదిగా తరలివచ్చిన భక్తులు మండల మహా పడిపూజను తిలకించి తరించిపోయారు. ఈ కార్యక్రమంలో కాంగ్రెస్ రాష్ట్ర కార్యనిర్వాహక అధ్యక్షుడు పొన్నం ప్రభాకర్, జిల్లా కాంగ్రెస్ పార్టీ అధ్యక్షులు నర్సారెడ్డి పాల్గొని ప్రత్యేక పూజలు నిర్వహించారు. ఈ సందర్భంగా ఆలయ అర్చకులు వారిని ఘనంగా సత్కరించారు.