సిద్దిపేట జిల్లా గజ్వేల్ మండలం అక్కారంలో విషాదం చోటుచేసుకుంది. చరవాణికి ఛార్జింగ్ పెడుతుండగా పదేళ్ల బాలికకు విద్యుత్ షాక్ తగిలి మృతి చెందింది. గ్రామానికి చెందిన కుమ్మరి కిష్టయ్య, బాలమణి దంపతులకు ఓ కుమారుడు, కూతురు ఉన్నారు. బాలమణి ఉపాధిహామీ పథకంలో కూలీ పనులకు వెళ్లింది. ఇంటి వద్దే ఉన్న కిష్టయ్య తన మొబైల్కు ఛార్జింగ్ పెట్టమని కూతురు స్రవంతికి తెలిపాడు.
చిన్నారి ప్రాణం తీసిన మొబైల్ ఛార్జర్
అల్లారు ముద్దుగా పెంచుకుంటున్న తన పదేళ్ల కూతురును మొబైల్ ఛార్జర్ బలితీసుకుంటుందని ఆ తండ్రి ఊహించలేకపోయాడు. చరవాణికి ఛార్జింగ్ పెట్టమని ఇవ్వగా... విద్యుత్ షాక్ తగిలి బాలిక మృతి చెందిన ఘటన సిద్దిపేట జిల్లా గజ్వేల్ మండలం అక్కారంలో జరిగింది.
మొబైల్ ఛార్జింగ్ పెట్టింది... ప్రాణాలు విడిచింది...
సెల్ఫోన్ ఛార్జింగ్ పెట్టేందుకు వెళ్లిన స్రవంతి విద్యుత్ షాక్తో గట్టిగా అరిచి పడిపోయింది. వెంటనే స్పందించిన కిష్టయ్య ఛార్జింగ్ వైర్ను తొలగించాడు. స్రవంతిని హుటాహుటిన గజ్వేల్ ప్రభుత్వ ఆస్పత్రికి తరలించారు. అప్పటికే బాలిక మృతి చెందినట్లు వైద్యులు తెలిపారు. స్రవంతి మృతితో కుటుంబంలో తీరని విషాదం నెలకొంది. కుటుంబ సభ్యులు, బంధువుల రోదనలు పలువురిని కంట తడి పెటించాయి.