మున్సిపల్​ కమిషనర్​పై బాధిత కుటుంబీకుల ఆగ్రహం

సంగారెడ్డి జిల్లా అమీన్​పూర్​ మండలం ఇసుకబావి వద్ద వరద ఉద్ధృతికి కారుతో సహా కొట్టుకుపోయిన ఆనంద్​ కుటుంబీకులను పరామర్శించేందుకు వెళ్లిన మున్సిపల్​ కమిషనర్​ సుజాతకు చుక్కెదురైంది. ఘటన జరిగి మూడు రోజులవుతున్నా.. తమ బిడ్డ ఆచూకీ లేదంటూ కుటుంబ సభ్యులు సుజాతపై ఆగ్రహం వ్యక్తం చేశారు. స్థానిక ఎమ్మెల్యే మహిపాల్​ రెడ్డిని దుర్భషలాడారు. అసలేమైందంటే..

గత కొన్ని రోజులుగా కురుస్తున్న వర్షాల కారణంగా సంగారెడ్డి జిల్లా అమీన్​పూర్​ మండలం ఇసుకబావి వద్ద వరద ఉద్ధృతికి మంగళవారం రాత్రి కారు కొట్టుకుపోయింది. ఘటనలో ఆనంద్​ అనే వ్యక్తి గల్లంతయ్యాడు. స్థానికుల సమాచారంతో రంగంలోకి దిగిన పోలీసులు, మున్సిపల్ సిబ్బంది, మత్స్యకారుల సాయంతో ఆనంద్​ కోసం గాలింపు చర్యలు చేపట్టారు. అయినప్పటికీ ఇప్పటి వరకు ఆచూకీ లభించలేదు.

ఈ క్రమంలో అమీన్​పూర్​ మున్సిపల్​ కమిషనర్​ సుజాత బాధిత కుటుంబీకులను పరామర్శించడానికి వచ్చారు. దీంతో కుటుంబ సభ్యులు సుజాతపై ఆగ్రహం వ్యక్తం చేశారు. స్థానిక ఎమ్మెల్యే మహిపాల్​రెడ్డిని దుర్భషలాడారు. తమ బిడ్డ గల్లంతై మూడు రోజులవుతున్నా.. ఇప్పటికీ ఎలాంటి పురోగతి లేదంటూ ఆవేదన వ్యక్తం చేశారు. తమను పరామర్శించేందుకు ఎవరూ రావొద్దని.. ఇక్కడికి ఏ ప్రభుత్వ వాహనం వచ్చినా తగులబెడుతామంటూ హెచ్చరించారు.