అన్నారంలో పోలీసుల నిర్బంధ తనిఖీలు... 59 ద్విచక్ర వాహనాలు స్వాధీనం..

సంగారెడ్డి జిల్లా అన్నారం గ్రామంలో ఎస్పీ చంద్రశేఖర్​ రెడ్డి ఆధ్వర్యంలో శుక్రవారం తెల్లవారు జామున నిర్బంధ తనిఖీలు చేపట్టారు. స్థానికేతరులపై నిఘా పెడుతున్నట్లు ఎస్పీ తెలిపారు.

సంగారెడ్డి జిల్లా గుమ్మడిదల మండలం అన్నారం గ్రామంలో పోలీసులు కార్డన్​ సెర్చ్​ నిర్వహించారు. శుక్రవారం తెల్లవారు జామున జిల్లా ఎస్పీ చంద్రశేఖర్​ రెడ్డి ఆధ్వర్యంలో 91 మంది పోలీస్​ సిబ్బంది నిర్బంధ తనిఖీలు చేపట్టారు. అన్నారం ప్రాంతంలో స్థానికేతరులు ఎక్కువమంది ఉన్నందున తనిఖీలు చేపట్టినట్లు ఎస్పీ తెలిపారు.

తనిఖీల్లో సరైన పత్రాలు లేని 59 ద్విచక్ర వాహనాలు, 3 కార్లు, 9 ఆటోలతో పాటు... ఇద్దరు పాతనేరస్థులు, 22 మంది అనుమానితులను పోలీసులు అదుపులోకి తీసుకున్నారు. గ్రామంలో ఇంటింటికి వెళ్లి వారి వివరాలను సేకరించినట్లు చెప్పారు. జిల్లా వ్యాప్తంగా తనిఖీలు నిర్వహిస్తామని ఎస్పీ స్పష్టం చేశారు.

ఇవీ చూడండి;'హయత్ నగర్​లో చెడ్డి గ్యాంగ్ హల్ చల్... 3 ఇళ్లల్లో చోరీ'