క్షేత్రస్థాయిలో కృషి.. జాతీయస్థాయిలో పురస్కారం...

గర్భిణీలు, బాలింతలు, కిషోర బాలికలు వివిధ ఆరోగ్య సమస్యలతో సతమతమవుతుంటారు. శిశువులు, చిన్నారులు పౌష్టికాహార లోపంతో బక్కచిక్కుతుంటారు. ఈ సమస్యలను తీవ్రంగా పరిగణించి పరిష్కరించేందుకు నడుంబిగించారు సంగారెడ్డి జిల్లా అధికారులు. ప్రజలను చైతన్యపరిచి, పోషణ లోప రహిత సమాజ నిర్మాణమే లక్ష్యంగా పని చేశారు. వీరి సేవలను గుర్తించిన కేంద్ర ప్రభుత్వం పోషణ్​ అభియాన్​ కార్యక్రమం అమలులో విశేష కృషి చేస్తున్నందుకు సంగారెడ్డి జిల్లాను జాతీయస్థాయిలో ఉత్తమ జిల్లాగా ఎంపిక చేసింది.

సంగారెడ్డి జిల్లా కలెక్టర్​గా బాధ్యతలు చేపట్టిన హన్మంతరావు... ఆరోగ్య సమాజాన్ని నిర్మించే పోషణ్‌ అభియాన్​పై ప్రత్యేక దృష్టి సారించారు. మహిళా, శిశు సంక్షేమ శాఖ, వైద్యారోగ్య శాఖ, పంచాయతీ రాజ్, గ్రామీణాభివృద్ధి సంస్థలను సమన్వయం చేసి.. పథకాన్ని పక్కాగా అమలయ్యేలా చర్యలు చేపట్టారు. క్షేత్రస్థాయిలో సేవలందించే అంగన్​వాడీ కార్యకర్తలు, ఆశావర్కర్లు, పాఠశాల ప్రధానోపాధ్యాయులకు.. శిక్షణ, అవగాహన కార్యక్రమాలు విస్తృతంగా చేపట్టారు.

అవగాహన కల్పించారు

గ్రామాల్లో పౌష్టికాహార లోపంతో ఉన్న చిన్నారులను గుర్తించి, వారికి సరైన ఆహారం అందేలా చేశారు. రక్తహీనతతో ఉన్న కిశోర బాలికలను గుర్తించి.. మందులు అందించారు. గర్భిణీలు, బాలింతలకు పౌష్టికాహారం అందిస్తూ ఆరోగ్య పరిరక్షణపై అవగాహన కల్పించారు. వంద శాతం ప్రసవాలు ప్రభుత్వాసుపత్రుల్లోనే అయ్యేలా జాగ్రత్తలు తీసుకున్నారు. మాత, శిశు మరణాలు తగ్గించేలా చర్యలు చేపట్టారు.

ఎన్జీవోల సాయంతో

గర్భిణీలకు క్రమం తప్పకుండా వైద్య పరీక్షలు చేస్తూ.. వ్యక్తిగత ఆరోగ్య నివేదిక రూపొందించారు. గ్రామాల్లో అంటు రోగాలు.. ఇతర వ్యాధులు ప్రబలకుండా పంచాయతీ రాజ్ శాఖ అధ్వర్యంలో పక్కాగా పారిశుద్ధ్య నిర్వహణ చేపట్టారు. అంగన్​వాడీల్లో పూర్వ ప్రాథమిక విద్యను సమర్థంగా అందించడానికి అజీమ్‌ ప్రేమ్‌జీ ఫౌండేషన్‌, మెడ్వాన్ వంటి ఎన్జీవోల సాయంతో అంగన్‌వాడీ కేంద్రాలను ఆదర్శంగా తీర్చిదిద్దారు.

అవే పేరు తీసుకొచ్చాయి

అనాథ పిల్లల సంరక్షణ, దివ్యాంగులకు ఉత్తమ సేవలందించడం వంటి చర్యలు సంగారెడ్డి జిల్లాను జాతీయ స్థాయిలో మొదటి స్థానంలో నిలిపాయి. కలెక్టర్​తో పాటు అయా శాఖల ఉన్నతాధికారులు చేసిన కృషికి కేంద్ర ప్రభుత్వం నుంచి అవార్డులు అందుకున్నారు.

• ఇదీ చూడండి : జైట్లీకి నివాళి.. నల్ల బ్యాడ్జీలతో భారత ఆటగాళ్లు