డబ్బులు వసూలు చేస్తే తొలగించండి: ఎమ్మెల్యే

పటాన్​చెరు వంద పడకల ఆసుపత్రిలో పారిశుద్ధ్య సిబ్బంది విధుల్లో నిర్లక్ష్యం వహిస్తున్నవారిని తొలగించాలని ఎమ్మెల్యే మహిపాల్​ రెడ్డి ఆదేశించారు. ఆస్పత్రి సమస్యలను త్వరలోనే తీరుస్తామని హామీ ఇచ్చారు.

సంగారెడ్డి జిల్లా పటాన్​చెరు ప్రభుత్వ ఆసుపత్రి అభివృద్ధి కమిటీ సమీక్ష సమావేశాన్ని ఎమ్మెల్యే మహిపాల్ రెడ్డి నిర్వహించారు. ఆస్పత్రిలో వైద్యుల సిబ్బంది కొరత ఉందని సూపరింటెండెంట్​ వసుంధర తెలిపారు. ఆసుపత్రికి కొత్త రక్తనిధి కేంద్రం మంజూరు అయినా.. ఇప్పటివరకు ఏర్పాటు చేయలేదన్నారు. డ్రైనేజీ సమస్యతో తీవ్ర ఇబ్బందులు పడుతున్నామని.. సీయామ్ లేకపోవడం వల్ల రోగులు ఇబ్బంది పడాల్సి వస్తుందని ఆమె పేర్కొన్నారు.

ఈ విషయాలపై స్పందించిన ఎమ్మెల్యే మహిపాల్ రెడ్డి వైద్య సిబ్బందిని ప్రభుత్వం త్వరలోనే నియమాకాలు చేపట్టనుందన్నారు. డ్రైనేజీ సమస్య తీర్చేందుకు అధికారులను ఆదేశిస్తామన్నారు. అవుట్​సోర్సింగ్​ సిబ్బందిపై ఫిర్యాదులు అందుతున్నాయని ఎమ్మెల్యే తెలిపారు. ప్రతి పనికి డబ్బులు ఇచ్చే దాకా వదిలి పెట్టడంలేదని.. అలాంటి వారిని వెంటనే విధుల నుంచి తొలగించాలని ఆదేశించారు. ఏదైనా గొడవ జరిగితే వెంటనే పోలీస్ కేసు పెట్టాలని సూచించారు.

ఇవీ చూడండి: 'దిశ కేసు నిందితులకు మరోసారి శవపరీక్ష'