'మీ రాజకీయం కోసం సంగారెడ్డి ప్రజలను చంపేస్తారా'

చెట్టు పెట్టాలన్నా మీరే.. కొట్టాలన్నా మీరేనా అని మంత్రి హరీశ్​రావుపై ఎమ్మెల్యే జగ్గారెడ్డి మండిపడ్డారు. కరోనా వ్యాధి విజృంభిస్తున్న వేళ సంగారెడ్డిలో మంత్రి కార్యక్రమాలు అవసరమా అని ప్రశ్నించారు. సంగారెడ్డిపై అంత ప్రేమ ఉంటే రూ.2వేల కోట్లు విడుదల చేయాలని కోరారు.

మంత్రి హరీశ్​రావు సంగారెడ్డికి వచ్చి ప్రజల ప్రాణాలు తీయొద్దని ఎమ్మెల్యే జగ్గారెడ్డి అన్నారు. సంగారెడ్డిలో కరోనా వ్యాప్తి ఎక్కువగా ఉందని ఇలాంటి సమయంలో హరీశ్​రావు వివిధ కార్యక్రమాల పేరుతో సంగారెడ్డికి వస్తున్నారని అయన ఆక్షేపించారు. హరీశ్​రావు చుట్టూ వందల సంఖ్యలో ప్రజలు ఉంటున్నారని అన్నారు. అందువల్ల కరోనా వ్యాప్తి చెందే అవకాశాలు ఎక్కువగా ఉన్నాయన్నారు.

సంగారెడ్డిపై అంత ప్రేమ ఉంటే 2 వేల కోట్లు ప్రకటించాలన్నారు. సంగారెడ్డి మున్సిపాలిటికి 500 కోట్లు, సదాశివపేటకు 500 కోట్లు మిగిలిన నాలుగు మండలాలకు 250 కోట్ల చొప్పున ఇవ్వాలన్నారు. మంత్రి హోదాలో వచ్చి పోలీసులు, అధికారులను ఇబ్బంది పెట్టవద్దని కోరారు.

ఇదీ చూడండి :దుర్గామాతకు బోనాలు సమర్పించిన మంత్రి అల్లోల